Ni nde kizigenza muri ruhago hagati ya Cristiano Ronaldo na Lionel Messi?

Ni nde kizigenza muri ruhago hagati ya Cristiano Ronaldo na Lionel Messi?

 Sep 24, 2021 - 07:21

Imwe mu ngingo zikomeye zo kuganira kuri ruhago y'isi ya none,  ni umunyabigwi ukomeye hagati y'umunya-Argentine,  Lionel Andres Messi w'imyaka 34 y'amavuko n'umunya-Portugal, Cristiano Aveiro Ronaldo w’imyaka 36. Ikibazo cyo kumenya urusha undi ibigwi hagati ya Messi 'La Pulgha' na Ronaldo 'CR7' gisubizwa akenshi n'ibitekerezo by'abakunzi b'umupira w'amaguru ahantu hose, aho impaka zimaze imyaka isaga cumi n'ibiri ishize kandi bizakomeza n’ejo hazaza.  

Umwanditsi: Frank Ngabo

Imyitwarire mu makipe (Clubs) ndetse n'imikorere mu butumwa bw'igihugu bishobora guca urubanza ku bibazo bitandukanye, mu gihe abantu nabo bagira uko babona buri mukinnyi bitewe n'ibyo bamukundaho. Ni nde rero mu by'ukuri ukomeye mu bihe byose? Ntuzigere na rimwe wibagirwa uwo ukunda, thechoicelive.com yarebye uburyo aba bombi bitwaye ingingo ku yindi,  aho ukura ibisubizo ku mibare itandukanye aba bombi bahuriraho.

 Aha turareba imibare igaragara mu;

. Ibitego mu makipe (Clubs)

. Imipira ivamo ibitego muri Club (Assists)

. UEFA Champions League

. Igikombe cy'isi

. Mu makipe y'ibihugu byabo

. Ibikombe

. Ibihembo bya buri muntu ku giti cye

  Ibitego mu ikipe (Clubs)

Cristiano Ronaldo yatsinze ibitego byinshi mu makipe kurusha Messi. Ariko kandi twakagombye kumenya ko uyu mukinnyi wa Manchester United amaze gukina imikino myinshi ndetse n'igihe kirekire kurusha Lionel Messi. Buri umwe muri bo amaze gutsinda ibitego birenga 670 mu makipe yakinnye kugeza ubu, aho kuva muri 2009-10 bagaragaje ko bazaba abakinnyi b'ibihe byose nka Diego Maradona na Pele bamamaye mu kinyejana cya 20. Mu gihe Ronaldo kuri ubu afite ibitego byinshi muri rusange, Messi agahigo ko gutsindira 'Club' ibitego byinshi mu mwaka umwe, aho yagejeje kuri 73 mu mwaka w'imikino wa 2011-12. Igihe Ronaldo yatsinze cyane mu mwaka ni aho yinjije ibitego 61, aho yabigezeho mu mwaka w'imikino wa 2014-15.

Ronaldo kandi yarengeje ibitego 50 buri mwaka, mu gihe cy'imyaka itandatu hagati ya 2011 na 2016. Ku bitego byo mu makipe, Ronaldo na Messi baragendana cyane, aho bigoranye cyane kubona intera y'ibitego icumi hagati yabo. Kugeza ubu Cristiano Ronaldo afite ibitego 678 mu gihe Messi amaze gutsinda 672. Bivuze ko Cristiano Ronaldo amurusha ibitego bitandatu.

 Gutanga imipira ivamo ibitego

 Ku bijyanye no gufasha abandi gutsinda, Messi aruta cyane Ronaldo kandi iryo tandukaniro rirushaho gukomera uko inshingano zabo zigenda zihinduka. Kuko hari ubwo Messi akina nk'ufasha abandi kubona imipira ivamo ibitego kurusha kwiyinjiriza ibitego. Kuba Messi atanga imipira ivamo ibitego byinshi kimwe no kubyitsindira ni ikintu cy'ingenzi mu guhitamo umukinnyi ukomeye. Messi amaze gutanga 'Assist' 226 mu gihe Cristiano Ronaldo amaze gutanga 139.

 Imibare muri UEFA Champions League

Ronaldo ni we watsinze ibitego byinshi muri Champions League, aho yanyuze mu makipe ya; Sporting CP,  Manchester United,  Real Madrid na Juventus,  aho yatsinze ibitego 135 mu mikino 180. Messi we amaze gutsinda ibitego 120 mu mikino 150. Imibare y'imikino n'ibitego muri Champions League igaragaza ko Messi ari we utsinda cyane kuko afite impuzandengo y'ibitego 0.81 ku mukino mu gihe Cristiano Ronaldo afite ibitego 0.77 ku mukino.

Ibigwi byabo mu bikombe by’isi

Ku bijyanye n'igikombe cy'isi, Ronaldo na Messi bafatwa nk'abatitwara neza ku mpamvu z'uko abakinnyi b'ibihugu byabo (Argentine & Portugal) badakomeye ugereranyije n'Abafaransa,  Abadage ndetse n'Abanya-Espagne batwaye ibikombe by'isi bitatu biheruka. Mu gikombe cy'isi, Ronaldo yatsinze ibitego byinshi muri iri rushanwa ndetse no mu mikino mike. Mu gihe Messi we yageze ku mukino wa nyuma na Argentine muri 2014 bagatsindwa n'u Budage igitego kimwe ku busa cyatsinzwe na Mario Gotzè mu minota y'inyongera.

Aha Messi yatwaye umupira wa Zahabu nk'uwatsinze ibitego byinshi mu irushanwa. Aha kure Cristiano Ronaldo yageranye n'ikipe y'igihugu ya Portugal 'Selecao' mu gikombe cy'isi ni muri kimwe cya kabiri cy'irangiza mu mwaka wa 2006, ubwo batsindwaga n' u Bufaransa mbere yo gutsindwa umukino w'umwanya wa gatatu n'Ubudage. Mu bikombe by'isi imbumbe, Ronaldo yatsinze ibitego 7 mu mikino 17. Mu gihe Messi yatsinze ibitego 6 mu mikino 19.

 Messi ari inyuma mu gutsindira igihugu

Ronaldo na Messi bafite inyandiko zijya gusa ku rwego mpuzamahanga. Ronaldo afite umubare munini w'ibitego, cyane ko yanatangiye gukinira ikipe y'igihugu ya Portugal mbere ho imyaka ibiri y'uko Messi ahamagarwa muri Argentine. Mu ikipe y'igihugu,  Ronaldo amaze kwinjiza ibitego 111 mu mikino 180 bimugira uwatsindiye igihugu ibitego byinshi mu mateka y'isi. Mu gihe Messi yatsindiye Argentine ibitego 76 mu mikino 151 akaba uwatsindiye Argentine ibitego byinshi.

 Ibikombe n'imidari

Messi na Ronaldo bafite ibikombe bisa cyane, ariko Messi ahindura ibintu iyo bigeze ku gikombe cya shampiyona, aho yatwaye La Liga ya Espagne inshuro 10 hamwe n'ikipe ya Barcelona. Ronaldo afite ibikombe birindwi bya shampiyona bifite umwihariko kuko yatsindiye shampiyona mu bihugu bitatu bitandukanye (Ubwongereza, Espagne n'Ubutaliyani), agahigo kongerera igitinyiro uyu rutahizamu wavukiye i Madeira. Ku rwego mpuzamahanga, Ronaldo yegukanye igikombe cy’Uburayi ndetse na UEFA Nations League ya 2020.

Mu gihe ku rundi ruhande, Messi yatwaranye na Argentine Copa America ya 2021 nyuma yo gutsindirwa ku mukino wa nyuma inshuro eshatu. Messi kandi afite umudari wa zahabu mu mikino Olempike yaboneye i Beinjing mu Bushinwa mu mwaka wa 2008 ndetse n'igikombe cy'isi cy'abatarengeje imyaka 20 batwariye mu Buholandi muri 2005.

 Ibihembo bya buri muntu ku giti cye

Messi na Ronaldo bagiye bagabana ibihembo bitandukanye mu myaka Cumi n'itatu ishize. Bihariye cyane umupira wa zahabu 'Ballon d'Or' ufatwa nk'igihembo gikuru ku mukinnyi uba waritwaye neza kurusha abandi mu mwaka. Messi yagiye imbere ya Ronaldo mu gutwara "Ballon d'or" ubwo yayegukanaga ku nshuro ye ya gatandatu muri 2019. Mu gihe igihembo cya 2020 nticyatanzwe  kubera icyorezo cya Coronavirus cyari cyarahagaritse ibikorwa byinshi by'imikino. Ronaldo yishimira cyane ibihembo bishya bya FIFA 'The Best' kandi yahawe igihembo cy'umukinnyi witwaye neza muri UEFA inshuro nyinshi.

Messi yegukanye ibihembo byinshi (6) by'umukinnyi witwaye neza muri shampiyona (La Liga). Ariko ku rundi ruhande, Ronaldo yihariye agahigo ko gutsindira igihembo cy'umukinnyi witwaye neza mu Bwongereza, Espagne n'Ubutaliyan, aho yagitwaye inshuro enye. Messi yatwaye inkweto ya zahabu y' i Burayi inshuro esheshatu nk'uwatsindaga ibitego byinshi mu mwaka. Mu gihe Ronaldo yatwaye iki gihembo inshuro eshanu. Cristiano Ronaldo na Lionel Messi bagaragaye mu ikipe nziza y'umwaka 'FIFPro World XI' inshuro 14 zose,  byerekana ko ari abakinnyi beza b'ibihe byose kandi bigoye kugira uwo urutisha undi.