Rutahizamu w'ikipe y'igihugu y'Ubufaransa Kylian Mbappé avuga ko "urugomo rugomba guhagarara", mu gihe imyigaragambyo yibasiye iki gihugu nyuma y'urupfu rw'umuhungu warashwe na polisi.
Kuva Nahel M, wari ufite imyaka 17, yakwicwa ku itariki ya 27 y'ukwezi gushize kwa Kamena i Nanterre mu nkengero y'umurwa mukuru Paris, ubwo yari atwaye imodoka ava aho yari yahagaritswe na polisi, Ubufaransa bwaranzwe n'amajoro arimo imvururu.
Nahel M w'imyaka 17 warashwe agateza imyigaragambyo mu Bufaransa
Mu butumwa yashyize kuri Instagram 'story', Mbappé yagize ati: "Urugomo nta kintu na kimwe rucyemura, cyane cyane iyo rugarutse ku barimo kurukora".Uyu mukinnyi w'imyaka 24 yasabye ko habaho imyigaragambyo "yo mu mahoro kandi yubaka".
Mu gihe Mbappé asaba ko imyigaragambyo ihagarara, abategetsi bavuze ko abantu barenga 900 batawe muri yombi mu ijoro ryo ku wa kane ryonyine, ari nako imyigaragambyo yakomeje ku wa Gatanu, kandi abapolisi barenga ibihumbi 45000 bakaba bashyizwe mu muhanda.
Mbappé arasaba ko imyigaragambyo karahabutaka iri mu Bufaransa ihagarara
Mbappé kandi mu nyandiko ye akaba yakomeje agira ati "Cyo kimwe n'abandi Bafaransa bose, twakozweho kandi tubabazwa n'urupfu rwa Nahel wari urubyiruko. " Ari nako yavuze ko abakinnyi badashobora guceceka kuri iki kibazo.
Hagati aho, Nahel M warashwe agateza imyigaragambyo karahabutaka, akaba akomokamo mu gihugu cya Morrocco, aho nyina ndetse n'abandi basaba ubutabera kuri Nahel M.
