Luka Modric yamaze kumvikana na Real Madrid kongera amasezerano muri iyi kipe, biteganyijwe ko azahaguma undi mwaka kugeza mu mpeshyi ya 2024.
Inkuru dukesha Relevo iravuga ko uyu mugabo w'imyaka 37 amasezerano Real Madrid yamweretse, akaba azakomeza kuba umukinnyi uhembwa menshi muri Real Madrid nyuma ya Karim Benzema na Eden Hazard.
Amasezerano ya Modric afite ubu azarangira muri Kamena 2024, ariko byitezwe ko aya masezerano mashya azatangazwa mbere y'umukino Real Madrid ifitanye na Manchester City muri kimwe cya kabiri cya UEFA Champions League ku wa Kabiri tariki 9 Gicurasi 2023.
Modric yemeye kongera amasezerano muri Real Madrid
Ibi bibaye nyuma y'uko ibihuha byari bikomeje kwiyongera bivuga ko Luka Modric ashobora gusanga Cristiano Ronaldo muri Al Nassr yo muri Saudi Arabia, n'ubwo we muri Werurwe yari yemeje ko yizeye ko azaguma muri Real Madrid.
Luka Modric ariyongera kuri Toni Kroos nawe uherutse kongera amasezerano y'umwaka umwe, aho Real Madrid yifuza gukoresha aba bagabo babiri mu kumenyereza Jude Bellingham bashaka kongeramo muri iyi mpeshyi.
Uyu munya-Croatia yageze muri Real Madrid mu 2012 avuye muri Tottenham aguzwe miliyoni 35 z'amapawundi ubwo iyi kipe yo muri Espagne yatozwaga na Jose Mourinho, aza kuba umunyabigwi afasha Real Madrid gutwara ibikombe birimo UEFA Champions League eshanu ndetse atwara Ballon d'Or ya 2018.
Imikino 480 niyo uyu mugabo amaze gukinira Real Madrid, akaba yarabashije gutsinda ibitego 37 muri iyo mikino anatanga imipira 77 yavuyemo ibitego. Ibi bituma agaragara nk'ibiganza byiza bwakwakira ndetse bikamenyereza Jude Bellingham.
Modric ni umwe mu bitezwe ku mukino wa Manchester City
