Inkuru dukesha ikinyamakuru The Sun iravuga ko ubu buri kimwe hagati ya Chelsea na Ousmane Dembele kiri ku murongo, uyu mufaransa akaba arayisinyira nyuma yo gusoza amasezerano muri FC Barcelona.
Bivugwa ko Dembele w'imyaka 25 yanze ibyo yahabwaga na PSG akemera kujya muri Chelsea itozwa n'umudage Thomas Tuchel wamutoje muri Borussia Dortmund.
Ousmane Dembele yinjiye muri FC Barcelona mu 2017 aguzwe akavagari ka miliyoni 125 z'amapawundi, none agiye kuyisohokamo nta amafaranga na make iyi kipe imukuyemo.
Uyu mufaransa Yakiniye FC Barcelona imikino 150 muri iyo myaka ayimazemo kuva mu 2017, atsindamo ibitego 32 ndetse anatanga imipira 34 yavuyemo ibitego.
Ousmane Dembele agiye kuva muri FC Barcelona (Net-photo)
Dembele yagowe n'imvune cyane muri Barcelona kugeza n'aho mu kwa mbere iyi kipe yakoze ibishoboka ngo imugurishe irebe ko yamukuramo make atarasoza amasezerano ariko bikananirana.
Gusa ibi bimaze kwanga, umutoza Xavi yongeye kumugirira ikizere amuha umwanya wo gukina, mu gice cya kabiri cya shampiyona atangamo imipira 13 yavuyemo ibitego.
N'ubwo ari igihe cyageze Dembele akabonwa nk'utagize icyo amaze i Barcelona, ubu agiye kugenda ariko abo muri Barcelona bose bifuzaga ko yongera amasezerano.
