Mu 2019 nibwo Antoine Griezmann yavuye muri Atletico Madrid yerekeza muri FC Barcelona, ariko yaje kugaruka mu 2021 ku ntizanyo y'imyaka ibiri harimo n'ingingo yo kumugura.
Bivugwa ko byaba ngombwa ko Atletico Madrid yakwishyura FC Barcelona miliyoni 35 z'amapawundi ikagura Griezmann burundu, mu gihe uyu musore yaba akinnye iminota byibuze 45 muri kimwe cya kabiri cy'imikino iyi kipe izakina muri uyu mwaka.
Mu kwirinda kugongwa n'iyi ngingo bumvikanye na FC Barcelona, Atletico Madrid imushyira mu kibuga byibura ku munota wa 61, 62, 63, 64 cyangwa nyuma yaho.
N'ubwo Atletico Madrid yahisemo kubigenza itya, ikinyamakuru Sport cyandikira muri Esipanye kivuga ko FC Barcelona igiye kujyana Atletico Madrid mu nkiko kuko ibyo bumvikanye byabaye.
Atletico iri gukinisha Griezmann iminota mike ngo itamugura(Image:Rex)
Muri Barcelona bo bavuga ko bumvikanye na Atletico Madrid ko mu gihe Antoine Griezmann yakina imikino 45 cyangwa irenzeho, mu mikino byibuze 50% mu mwaka we wa mbere ari mu ntizanyo, bizaba itegeko ko Atletico Madrid imugura burundu.
Bivuze ko muri FC Barcelona bakora imibare badashyizemo umwaka wa kabiri ariwo turimo ubu, mu gihe muri Atletico Madrid bavuga ko uyu mwaka nawo ugomba kubarwa mu kubara iyo mikino 50%.
Amakuru ahari avuga ko FC Barcelona yamaze kumenyesha Atletico Madrid ko izagana inkiko mu gihe batakwishyura miliyoni 35 z'amapawundi bumvikanye zo kugura Griezmann burundu.
Ubwo Antoine Griezmann yajyaga muri FC Barcelona mu 2019 yaguzwe miliyoni 108 z'amapawundi, atsinda ibitego 35 mu mikino 102 yayikiniye, ahita yongera gutizwa muri Atletico Madrid mu 2021.
Uyu mugabo w'imyaka 31 mu mwaka w'imikino ushize yakiniye Atletico Madrid imikino 39 abanza mu kibuga imikino 32, ayitsindira ibitego umunani.
