Nyuma y'iperereza rimaze imyaka isaga ine, kuri uyu wa Mbere nibwo byatangajwe ko Manchester City iregwa kuba itarubahirije amabwiriza agenga imikoreshereze y'umutungo muri Premier League.
Manchester City ishinjwa kwica ingingo 100 mu mabwiriza agenga ubukungu ya Premier League, ikaba yarabikoze hagati ya 2009 ndetse na 2018 ubwo iryo perereza ryatangiraga.
Mu bihano iyi kipe ishobora guhabwa mu gihe iri perereza ryaba ryemeje ko koko igomba guhanwa, harimo gukurwaho amanota nk'ibiherutse gukorerwa Juventus yakuweho amanota 15 muri shampiyona ya Serie A.
Hari kandi kuba ishobora gukurwa muri Premier League ikamanurwa mu byiciro byo hasi, kwamburwa ibikombe bya Premier League yatwaye muri iyo myaka, kubuzwa kugura abakinnyi mu gihe runaka n'ibindi bihano bishobora kujyana n'ibyo.
Ibi bibaye nyuma y'uko mu 2020 UEFA yari yafatiye ibihano Manchester City nabwo ku bijyanye no kwica itegeko rya 'UEFA Financial Fair Play'. Aha iyi kipe yari yahagaritswe imyaka ibiri mu mikino ya UEFA, ndetse yanaciwe ihazabu ya miliyoni 25 z'amapawundi.
Nyuma y'amezi atanu, Manchester City yarajuriye urukiko rwa TAS rwemeza ko icibwa amande ya miliyoni ikenda z'amayelo gusa.
Muri Kanama muri icyo gihe nibwo Pep Guardiola yatangaje ijambo abenshi bagarutseho kuri uyu munsi bitewe n'uko n'ubundi hagarutse ibirego bisa nk'ibyo iyi kipe yari yarezwe muri icyo gihe.
Guardiola yagize ati:"Navuganye n'abantu bange ndababwira nti'mumbwire kuri ibyo. Narabarebye ndabizera ijana ku ijana kuva ku munsi wa mbere nshyigikira ikipe.
"Narababwiye nti' nimumbeshya, umunsi ukurikiyeho sinzaba ndi hano. Nzasohoka kandi ntimuzongera kuba inshuti zange ukundi.
"Nkunda guhagararira ikipe iri gukora ibintu neza. Ku musozo ntibizaba ari gutwara Champions League cyangwa Premier League, nukubikora neza ku bw'abantu bacu n'abafana bacu."
Mu magambo ya Pep Guardiola humvikanagamo ko atazi ibyo birego ikipe ye iba iregwa, ndetse akemeza ko mu gihe baba bamubeshya kandi babikora azigendera mu gihe bazaba batahuwe.
Kugeza ubu ntabwo byari byemezwa neza niba Manchester City ihamwa n'ibi birego, ndetse ngo hatangazwe ibihano igenerwa. Kugeza ubu iyi kipe iri ku mwanya wa kabiri ku rutonde rw'agateganyo rwa Premier League aho ifite amanota 45, aho irushwa amanota atanu na Arsenal iri ku mwanya wa mbere.
Manchester City itegereje ibihano igenerwa
