Undi mutoza yanze akazi ka Manchester United

Undi mutoza yanze akazi ka Manchester United

 Nov 25, 2021 - 06:36

Roberto Mancini yanze akazi ka Manchester United mu gihe ari kwitegura igikombe cy'isi.

Nyuma y'iyirukanwa rya Ole Gunnar Solskjaer watozaga Manchester United, ubu ikigezweho muri Manchester United ni gushaka umutoza mushya yaba uw'agateganyo cyangwa uw'igihe kirekire.

Manchester United kuri iyi nshuro yegereye umutariyani utoza ikipe y'igihugu y'Ubutariyani witwa Roberto Mancini wanatoje ikipe ya Manchester City.

  Roberto Mancini utoza Ubutariyani(Net-photo)

Uyu mugabo w'imyaka 56 rwose ngo yahakaniye iyi kipe yo mu mujyi wa Manchester dore ko ikimuraje ishinga ubu ari guhesha iyi kipe y'Ubutariyani itike y'igikombe cy'isi kuko igomba gukina imikino ya kamarampaka.

Igitangazamakuru cyo mu Budage kitwa BILD nicyo cyatangaje ko Roberto Mancini yashwishwurije ikipe ya Manchester United.

Mancini aherutse gufasha ikipe y'igihugu y'Ubutariyani gutwara igikombe cya Euros 2020 aho batsinze Ubwongereza ku mukino wa nyuma wabereye Wembley mu Bwongereza.

Mu gushaka itike y'igikombe cy'isi, iyi kipe y'igihugu yabaye iya kabiri mu itsinda inyuma ya Switzerland bituma badahita babona itike y'igikombe cy'isi ahubwo bazakina imikino ya kamarampaka.

Roberto Mancini yatoje Manchester City(Net-photo)

Abashoramari bagifata ikipe ya Manchester City mu 2008 Roberto Mancini bahise bamuha akazi ko kuyitoza. Mu myaka ine yamazemo yatwaye igikombe cya FA mu 2011 ndetse umwaka ukurikiyeho ahita atwara igikombe cya shampiyona.

Nyuma yo kuva muri Manchester City, no mu ikipe y'igihugu y'Ubutariyani yaje guhirwa kuko yabahesheje igikombe cya euros giheruka ndetse anakina umukino unogeye ijisho utandukanye n'uko Ubutariyani bwakinaga mbere.