Mohamed Salah agomba kuba ari kumwe n'ikipe ye y'igihugu ya Misiri mu gikombe cy'Afurika cyizatangira mu kwezi kwa mbere ndetse Misiri yifuzaga ko uyu musore yahagera mbere y'uko umwaka wa 2021 urangira.
Gusa kuri iyi nshuro ikipe ya Liverpool yamaze kumvikana na FA yo mu Misiri ko uyu mugabo bazamurekura amaze gukina umukino Liverpool ifitanye na Chelsea.
Byari byitezwe ko uyu mugabo w'imyaka 29 ashobora kuzabura ku mukino w'iyi kipe yahozemo ya Chelsea kubera igikombe cy'Afurika.
Biteganyijwe ko ikipe ya Misiri izakina umukino wayo wa mbere tariki 11 Mutarama 2022, ubwo izaba ikina na Nigeria. Ni iminsi 9 nyuma y'umukino wa Liverpool na Chelsea.
Uyu ni umwe mu mikino ikomeye muri Premier league muri uyu mwaka w'imikino dore ko ari amakipe abiri muri atatu bigaragara ko afite amahirwe yo gutwara igikombe cya shampiyona.
Liverpool kandi ikomeje kugerageza kuri Senegal na Guinea ngo barebe ko naho byagenda neza kuri Sadio Mané na Naby Keita nabo bazaza mu gikombe cy'Afurika.
Ikipe ya Liverpool ni imwe mu makipe byitezwe ko izagorwa cyane muri iyi CAN dore ko ubusatirizi bwayo buba butwawe na Salah ndetse na Mané bazagenda hakiyongeraho na Naby Keita.
Muri Liverpool kandi harimo amakuru meza ko Virgil van Dijk, Curtis Jones na Fabinho bari barwaye Covid-19, bose baragaruka tariki 28 Ukuboza 2021 ubwo Liverpool izaba ikina na Leicester City.
Ndetse na Thiago Alcantara afite amahirwe menshi ko kuri uwo mukino bazakinamo na Chelsea ashobora kuzaba ahari ameze neza cyane.
Mohamed Salah azakina umukino wa Chelsea(Image:Mirror)
Salah azakinira Misiri muri CAN ya 2021(Image:Olympics)
