Ibya Zinedine Zidane muri Manchester United byagiye ahagaragara

Ibya Zinedine Zidane muri Manchester United byagiye ahagaragara

 Nov 22, 2021 - 12:42

Zinedine Zidane ntashishikajwe n'akazi ko gusimbura Ole Gunnar Solskjaer muri Manchester United.

Ikipe ya Manchester United ikomeje gushaka umutoza ugomba gusimbura Ole Gunnar Solskjaer uherutse kwirukanwa nyuma yo gutsindwa na Watford ibitego 4-1.

Iyi kipe ivugwamo abatoza benshi, yegereye umutoza Zinedine Zidane umufaransa uherutse gutandukana n'ikipe ya Real Madrid mu mpeshyi ishize.

  Zidane ubu nta kipe atoza(Image:Metro)

Amakuru yavuzwe mu minsi ishize ariko yongeye gutangazwa na BBC sport aravuga ko uyu mugabo w'umufaransa adashaka rwose akazi ko gutoza iyi kipe yo mu mujyi wa Manchester.

Kuba muri Real Madrid yarakoranye na Cristiano Ronaldo kimwe na Rafael Varane, biri mu bituma abenshi bizera ko ashobora kujya muri Manchester United ariko siko bimeze.

Ahubwo uwitwa Guilliem Balague atangaza ko Zinedine Zidane ashobora kujya mu ikipe ya PSG igihe Mauricio Pochettino yaba agiye muri Manchester United.

Akazi ka mbere gashishikaje Zidane ni ukuba umutoza w'ikipe y'igihugu y'Ubufaransa ariko bigaragara ko umutoza wayo Didier Deschamps atazayivamo mbere y'igikombe cy'isi.

  Mauricio Pochettino utoza PSG(Image:Eurosport)

Uwitwa Mauricio Pochettino we amakuru aravuga ko yiteguye kuva muri PSG isaha n'isaha igihe Manchester United yaba imukeneye kuko atishimye muri iyo kipe.

Pochettino ari kuba muri hoteli mu gihe umuryango we wagumye mu Bwongereza i London aho bari basanzwe baba.