Mu gihe gito Erling Haaland amaze muri Premier league yatangiye gushyiraho uduhigo muri iyi shampiyona ikunzwe, ariko hari n'utundi byitezwe ko azakuraho nakomereza ku muvuduko ariho.
Uyu musore w'imyaka 22 yinjiye mu ikipe ya Manchester City muri iyi mpeshyi aguzwe miliyoni 51 z'amapawundi ava mu ikipe ya Borussia Dortmund.
Nyuma y'icyo gihe nta mwanya wo kumenyera Premier league yafashe kuko yatsinze ibitego bibiri ku mukino wa mbere wa shampiyona ikipe ye yakinnye na West Ham United, ubu akaba amaze gutsinda ibitego 14 mu marushanwa yose.
Erling Haaland amaze gutsinda ibitego 11 mu mikino irindwi ya Premier league amaze gukina, aka kakaba ari agahigo yakuyeho kari gafitwe na Mick Quinn wabitsinze kuva mu Ugushyingo 1992.
Haaland yatsinze ibitego 9 mu mikino itanu ya mbere ndetse anabitsinda mu kwezi kumwe kwa Munani. Aka nako ni gahigo yakuyeho ko gutsinda ibitego byinshi mu kwezi kwa munani muri Premier league.
Si ibyo gusa kuko Erling Haaland ariwe mukinnyi wa mbere wabashije gutsinda igitego ku mukino we wa mbere muri Champions league mu makipe atatu atandukanye. Ibi yabikoze muri RB Salzburg, Borussia Dortmund na Manchester City.
Haaland yitezweho gukuraho uduhigo twinshi (Image:AP)
Gusa nubwo uyu rutahizamu amaze gukuraho utu duhigo twose, hari uduhigo tundi icumi ashobora gukuraho muri uyu mwaka mu gihe byakomeza kumuhira nk'uko amerewe muri iyi minsi.
Ibitego byinshi mu mwaka umwe wa Premier league
Kugeza ubu Andy Cole na Alan Shearer nibo bafite agahigo ko gutsinda ibitego byinshi mu mwaka umwe w'imikino, kuko Andy Cole yatsinze 34 mu mwaka 1993-94 mu gihe Alan Shearer nawe yahise abitsinda mu mwaka wakurikiyeho.
Muri icyo gihe amakipe yakinaga imikino 42 ya shampiyona, bitandukanye n'ubu amakipe akina imikino 38 gusa. Haaland umaze gutsinda ibitego 11 mu mikino 7, biramusaba gutsinda ibitego 24 mu mikino 31 isigaye ubundi agakuraho agahigo k'aba bagabo.
Ibitego byinshi muri Premier league y'imikino 38
Mohamed Salah ukinira Liverpool niwe ufite agahigo ko gutsinda ibitego byinshi mu mwaka w'imikino wa Premier league kuva batangira gukina imikino 38. Uyu munyamisiri yatsinze ibitego 32 mu mwaka 2017-2018, bivuze ko Erling Haaland abura ibitego 22 mu mikino 31 asigaje ngo akureho aka gahigo ka Salah.
Ibitego byinshi muri shampiyona eshanu zikomeye ku isi
Aka ni akandi gahigo Erling Haaland ashobora gujigira gukuraho n'ubwo abenshi babibona nk'ibigoye. Ni agahigo gafitwe na Lionel Messi watsinze ibitego 50 mu mwaka 2011-2012 muri shampiyona ya La liga.
Igitego kuri buri mukino yakinnye
Aka ni agahigo uyu muhungu yaba ashyizeho yisangije kuko nta muntu wabashije kubikora muri Premier league. Gusa Harry Kane yari hafi kubikora mu mwaka 2016-2017 aho yatsinze mu mikino 29 muri 30 yakinnye.
Ibitego byinshi muri Manchester City mu mwaka umwe
Aka ni agahigo kamaze imyaka na nyagateke muri Manchester City gafitwe na Tommy Jonhson wakiniye iyi kipe mu myaka yo ha mbere. Uyu mugabo yabashije gutsinda ibitego 38 mu marushanwa yose yakinnye mu 1920.
Erling Haaland ashobora gukuraho aka gahigo kagiye kumara imyaka 100 karabuze uwagakuraho.
Ibitego byinshi mu mwaka wa Champions league
Aka ni akandi gahigo gafitwe na rurangiranwa Cristiano Ronaldo watsinze ibitego 17 mu mikino 11 yakinnye mu mwaka 2013-2014. Haaland we amaze gutsinda ibitego bitatu mu mikino ibiri amaze gukina.
Ibitego byinshi mu kwezi
Umukinnyi ufite aka gahigo ni umunya-Uruguay Luis Suarez watsinze ibitego 10 mu Ukuboza 2013 ubwo yari muri Liverpool. Aha Suarez ararusha Haaland watsinze 9 mu kwa munani ariko aracyafite andi mezi yo kureba ko yakuraho ako gahigo.
Gutsinda ibitego mu mikino myinshi ikurikirana
Aka ni agahigo gafitwe na rutahizamu Jamie Vardy ubwo Leicester City yatwaraga igikombe 2015-2016 aho yamaze imikino 11 atabura igitego. Kugeza ubu Haaland ageze ku mikino itanu adasiba gutsinda.
Hat-trick nyinshi mu mwaka umwe wa Premier league
Alan Shearer ufite agahigo k'ibitego byinshi muri Premier league ni nawe ufite agahigo ko gutsinda hat-trick nyinshi mu mwaka umwe w'imikino. Shearer yatsinze hat-trick eshanu mu mwaka wa 1995-1996 ubwo yakinaga muri Blackburn.
Mu mikino irindwi Haaland amaze gukina amaze gutsindamo hat-trick ebyiri, bivuze ko mu mikino 31 asigaranye asabwa gutsindamo eshatu bakanganya cyangwa agatsinda enye akamurusha.
Imikino mike ngo utsinde ibitego 30 na 35 muri Champions league
Umuhorandi Ruud Van Nisterlooy ufite utu duhigo byamusabye imikino 34 ngo atsinze ibitego 30 muri Champions league, mu gihe yatsinze ibitego 35 amaze gukina imikino 42.
Kugeza ubu Erling Haaland amaze gutsinda ibitego 25 mu mikino 20 amaze gukina muri Champions league, bivuze ko abura ibitego 5 ngo akureho agahigo ka mbere mu gihe asabwa icumi ngo akureho aka kabiri.
