Biravugwa ko Chelsea yiteguye kwakira miliyoni 70 z'amapawundi ku ikipe izaba yifuza Mason Mount mu mpeshyi ya 2023, mu gihe amasezerano ye azarangira mu mpeshyi ya 2024 akaba atari kwemera gusinya amasezerano mashya.
Manchester United na Liverpool ni amwe mu makipe bivugwa ko yifuza uyu mwongereza w'imyaka 24, ndetse muri iki cyumweru hiyongereyeho na Bayern Munich yo mu Budage.
Chelsea yifuza kurekura abakinnyi mu mpeshyi ya 2023 nyuma y'uko yashoye miliyoni 600 z'amapawundi igura abakinnyi muri uyu mwaka w'imikino, ikinyamakuru The Atletic koratangaza ko izakira miliyoni 70 z'amapawundi kuri Mason Mount.
Mu gihe Mason Mount ataba yumvikanye na Chelsea cyangwa ngo aya makipe yemere kwishyura aya mafaranga, byazaba ngombwa ko azava muri Chelsea mu mpeshyi ya 2024 ndetse akagendera ubuntu.
Liverpool yiritegura kurekura Naby Keita, James Milner na Oxlade Chamberlain ndetse na Arthur Melo akaba ashobora gusubira muri Juventus, iyi kipe ikeneye cyane umukinnyi wo hagati mu kibuga nka Mason Mount.
Bayen Munich yabaye ikipe nshya ikomeye yiyongereye mu makipe yifuza Mount nyuma yo gusinyisha Thomas Tuchel wamutoje muri Chelsea ndetse bagiranye ibihe byiza birimo kwegukana UEFA Champions League n'Igikombe cy'isi cy'ama-club.
