Buri mukinnyi uri mu ikipe ya Arsenal azahabwa ibihumbi 500 by'amapawundi[Asaga miliyoni 500 Rwf] mu gihe baba babashije gusoza mu makipe ane ya mbere, bagakina champions league mu mwaka utaha w'imikino.
Nyuma y'uko iyi kipe ya Mikel Arteta itsinze Watford mu mpera z'icyumweru gishize, ubu ifite amahirwe menshi yo gusoza ku mwanya wa kane inyuma ya Manchester City, Liverpool na Chelsea.
Aya manota atatu yatumye Arsenal ihita ifata umwanya wa kane aho irusha Manchester United inota rimwe kandi igifite imikino itatu itarakina y'ibirarane.
Ikipe ya Arsenal yaba igarutse muri champions league bwa mbere kuva mu 2017, ndetse yakwakira miliyoni 50 z'amapawundi nk'ibihembo ndetse n'ayo kwerekanwa kuri televiziyo.
Nk'uko bitangazwa na Daily Mail hari agahimbazamusyi kazatangwa ku ikipe ya Arsenal, aho bose bazagabana bikarangira byibuze buri wese abonye ibihumbi 500 by'amapawundi.
Si ibi gusa kandi kuko ngo biturutse ku biri mu masezerano ya buri mukinnyi wa Arsenal, amafaranga bahembwa ku cyumweru azahita yiyongera mu gihe baba bari gukina champions league.
Nyuma yo gufata umwanya wa kane, Mikel Arteta nawe mu magambo ye yumvikanishije ko afite ikizere cyo gusoza mu makipe ane ya mbere muri Premier league, ariko akongeraho ko atareba ahazaza.
Arteta yagize ati:"Mvugishije ukuri, sinkunda kureba ku rutonde rwa shampiyona cyane kuko dufite imikino y'ibirarane.
"Tugiye gukina imikino itandukanye kandi ndabizi intego ni imwe, ni kugerageza gutera imbere ejo ku byo twakoze uyu munsi ubundi tukajya mu wundi mukino, kandi ni ibyo.
"Sinshobora kugenzura ibiva mu mukino kandi sinamenya imikino tugiye gutsinda, iyo tugiye kunganya cyangwa iyo tugiye gutsinda, ntibishoboka.
"Ndamutse ntangiye gukora ibyo ntekereza ko twatakaza intumbero ku byo dushaka gukora."
Arsenal ifite amahirwe menshi yo gusubira muri champions league(Image:Football365)
