Pep Guardiola utoza Manchester City afite ikizere kiri hejuru ko Robert Lewandowski yakwibona neza muri FC Barcelona, nyuma y'amakuru amaze iminsi yerekeza uyu mugabo muri iyi kipe y'i Barcelona.
Lewandowski w'imyaka 33 yamaze gutangaza ko yifuza kuva muri Bayern Munich amazemo imyaka umunani, akaba yarayigezemo avuye muri Borussia Dortmund.
Aganira n'ikinyamakuru One Sport cyo muri Poland, Lewandowski yagize ati:"Ndashaka gusa kuva muri Bayern Munich. Ubunyangamugayo n'icyubahiro ni ingenzi kurenza akazi. Icyiza cyakorwa ni gushakira hamwe igisubizo.
"Ntibigeze bashaka kunyumva kugeza ku musozo. Hari icyapfuye muri nge - kandi ntibishoboka kubirenga. N'iyo waba ushaka kuba umunyamwuga, ntushobora kubirenga."
Lewandowski yifuza kuva muri Bayern Munich(Image:Sport bild)
Ubwo Pep Guariola yabazwaga ku bya Robert Lewandowski bivugwa ko ashaka kujya muri FC Barcelona, yavuze ko abona yakwibona muri iyi kipe ariko afite impungenge ko Barca itazamwigondera kubera ibibazo by'ubukungu, ndetse bikaba binagoye ko Bayern Munich izamurekura.
Pep Gardiola aganira na Sky sports yagize ati:"Sinzi, mu by'ukuri, ese yakwisangamo? Turi kuvuga kuri Lewandowski.
"Yakwisanga ahantu hose vuba. Ariko sinzi niba FC Barcelona ishobora kumusinyisha kubera ibihe by'ubukungu barimo cyangwa niba Bayern Munich izamureka akagenda."
Pep Guardiola yatoje Lewandowski muri Bayern Munich(Image:Getty)
N'ubwo azuzuza imyaka 34 muri Kanama, Robert Lewandowski aracyari umwe mu bataka beza bari ku mugabane w'Uburayi. Mu mikino 46 yakiniye Bayern Munich mu mwaka w'imikino ushize, Lewandowski yabashije gutsindamo ibitego 50 byose.
Uyu mugabo akomeje gukora ibishoboka byose ngo arebe ko ikipe ya Bayern Munich yanurekura. Nk'uko byumvikana mu magambo ye agaruka ku kuba icyubahiro kiruta byose yahabwa, bivugwa ko uburyo Bayern Munich yashatse kumuguriraho Erling Haaland yabifashe nk'agasuzuguro.
