Kuri iki cyumweru nibwo muri Cameroon haratangira igikombe cya Afurika aho umukino wa mbere urahuza Cameroon na Burkina Faso saa 18:00 ku masaha yo mu Rwanda.
Ni igikombe kigiye kuba mu gihe isi yugarijwe n'icyorezo cya Covid-19 ndetse hari impungenge ko hari abakinnyi benshi bazagenda barwara mu irushanwa.
Amabwiriza mashya y’impuzamashyirahamwe y’umupira w’amaguru muri Afurika (CAF) avuga ko imikino izaba nta gisibya n'ubwo muri abo bakinnyi 11 nta n’umwe muri bo waba asanzwe akina nk’umunyezamu.
Igihugu icyo ari cyo cyose kizananirwa kwitabira umukino kizajya giterwa mpaga y’ibitego 2-0.
Aya mabwiriza asohotse nyuma y'uko ibihugu byinshi bitangaje ko mu makipe yabyo habonetsemo abanduye Covid-19, mbere yuko iri rushanwa ritangira kuri iki cyumweru.
CAF yavuze ko "mu bihe byihariye" akanama gategura irushanwa "kazafata icyemezo gikwiye".
Ku wa gatanu, ikipe y’igihugu ya Misiri yabaye ihagaritse guhaguruka yerekeza muri iri rushanwa ribera muri Cameroon, ndetse biba ngombwa ko ihagarika imyitozo, nyuma y'uko muri iyi kipe hagaragayemo abanduye Covid-19.
Iyi kipe ya Misiri, ifite umuhigo wo kuba ari yo imaze kwegukana iri rushanwa inshuro nyinshi inshuro zirindwi, nyuma yaje kwerekeza muri Cameroon ku wa gatandatu.
Rutahizamu wa Arsenal Pierre-Emerick Aubameyang ni umwe mu bakinnyi babiri basanzemo Covid-19 ku wa kane mu ikipe y’igihugu ya Gabon.
Byabaye ngombwa ko ikipe y’igihugu ya Guinea isiga mu Rwanda, aho yari yabanje kwitoreza, myugariro wayo Mikael Dyrestam, umukinnyi wo hagati Morlaye Sylla na rutahizamu Seydouba Soumah.
Amakipe ya Cape Verde hamwe na Gambia - iyi yitabiriye iri rushanwa ku nshuro ya mbere, mu cyumweru gishize yibasiwe n’ubwandu bwinshi, mu gihe Tunisia na yo yatangaje ko hari abanduye aho yari yabanje kwitoreza mbere y’iri rushanwa.
AFCON iratangira kuri iki Cyumweru(Net-photo)
