Kuri uyu wa kane saa 21:45 ku masaha yo mu Rwanda nibwo hateganyijwe umukino wa kimwe cya kabiri cy'igikombe cya English Football Legue ugomba guhuza Arsenal na Liverpool.
Gusa kubera ibibazo bya Covid-19 hatangiye kuzamuka impungenge ko uyu mukino wanasubikwa nyuma y'uko umwungiriza wa Jurgen Klopp wari kuzatoza Liverpool yamaze kwandura Covid-19 ndetse ikaba ikomeje kwiyongera muri Liverpool.
Jurgen Klopp amaze iminsi mu kato nyuma yo kurwara Covid-19, Pep Lijnders umwungirije niwe wari watoje umukino wabahuje na Chelsea ndetse ni nawe byari biteganyijwe ko azatoza umukino uzabahuza na Arsenal.
Nyuma y'uko mu ijoro ryahise uyu mugabo amenye ko yanduye, byabaye ngombwa ko ikiganiro n'itangazakuru cyari giteganyijwe ku gicamunsi cy'uyu munsi cyahise gikurwaho kuko nta wundi muntu washyizweho ngo aze kuganira n'itangazamakuru.
Nyuma y'abakinnyi batandukanye ba Liverpool bari mu kato, ubu Jurgen Klopp n'umwungiriza we bose bari mu kato kuko barwaye Covid-19 ndetse abenshi batangiye kwibaza niba uyu mukino utasubikwa.
Gusa ku rundi ruhande hakomeje kwibazwa umuntu watoza iyi kipe ya Liverpool mu gihe haba hafashwe umwanzuro ko uyu mukino ugomba kuba nk'uko byari biteganyijwe.
Liverpool ni ikipe ikomeje kwibasirwa na Covid-19 cyane dore ko ubu abakinnyi nka Alisson Becker, Joel Matip na Roberto Firmino bose barwaye.
Ndetse mbere ya Noheli iyi kipe hari imikino yakinnye idafite Fabinho, Virgil Van Dijk na Curtis Jones kubera iki cyorezo.
Pep Lijnders wungirije Jurgen Klopp yanduye Covid-19(Net-photo)
Klopp n'umwungiriza we bari mu kato(Net-photo)
Haribazwa niba umukino wa Liverpool na Arsenal wasubikwa(Net-photo)
