Mu mpera z'iki cyumweru shampiyona y'Ubwongereza yari yahagaze ngo hakinwe imikino ya FA cup aho Chelsea yakinnye na Chesterfield aho umukino warangiye Chelsea itsinze ibitego bitanu kuri kimwe cya Chesterfield.
Muri uyu mukino ubwo haburaga iminota 30 ngo urangire, umutoza Thomas Tuchel yahagurukije umusore w'imyaka 26 w'Umwongereza witwa Lewis Baker aho yinjiye mu kibuga asimbuye.
Lewis Baker yahawe ikaze mu kibuga muri iyi minota yari isigaye. Uyu wari umukino wa mbere akiniye Chelsea mu myaka 8 ishize ndetse ukaba uwa kabiri ayikiniye muri rusange kuva yayigeramo.
N'ubwo uyu wari umukino wa kabiri kuri Lewis Baker, uyu musore yageze muri iyi kipe kera kuko yahageze mu 2005 avuye muri Luton Town. Umukino wa mbere yawukinnye tariki 5, Mutarama mu 2014.
Jose Mourinho yashyize Lewis Baker mu kibuga ubwo hari hasigaye iminota itatu ku mukino Chelsea yatsinzemo Derby Count ibitego 2-0 mu 2014.
Uyu musore yakunze kugira ibibazo by'imvune ndetse agakunda no gutizwa byagiye bituma atagaragara mu kibuga mu mwenda wa Chelsea inshuro nyinshi.
Uyu mukino wa kabiri yakinnye kuri uyu wa Gatandatu ushobora kumuzamurira ikizere akaba yagaruka akaba umukinnyi mwiza nk'uko aricyo cyamuzanye muri Chelsea.
Mu kwezi gushize byari biteganyijwe ko Lewis Baker yari kugaragara ku mukino wa Chelsea na Brentford muri kimwe cya kane cya Carabao cup. Gusa ubwo uyu mukino wari wegereje yahise arwara Covid-19 bituma atabona ayo mahirwe.
Igitegerejwe ni kureba niba Lewis Baker yazura umutwe muri iyi kipe dore ko n'amasezerano ye muri Chelsea azarangira mu mpeshyi ya 2022 ubwo uyu mwaka w'imikino uzaba urangiye.
Lewis Baker ukina hagati mu kibuga yagiye atizwa mu makipe atandukanye arimo Leeds United ndetse iyo aherukamo ni Trabzonspor yo muri Turikiya.
Lewis Baker yakinnye umukino wa 2 muri Chelsea(Image:The sun)
Umukino wa mbere yawukinnye mu 2014(Net-photo)
