Xavi Hernandes utoza FC Barcelona ntazatoza iyi kipe mu mukino wa gicuti izakina na Inter Miami kuri uyu wa Gatatu nyuma yo kongera kwangirwa kwinjira muri leta zunze ubumwe za America.
Ku wa Gatandatu ubwo abakinnyi ba FC Barcelona berekezaga ku kibuga cy'indege cy'i Barcelona, ntabwo Xavi yabashije kujyana n'ikipe ye muri Leta zunze ubumwe za America bitewe n'uko mu minsi ishize yagiye yinjira mu gihugu cya Iran.
Byari biteganyijwe ko kuri uyu wa kabiri aribwo uyu munya-Esipanye yerekeza muri leta zunze ubumwe za America agasanga ikipe ye, ariko ntabwo iki gihugu kiremerera uyu mutoza kwinjira.
Mu myaka itanu ishize Xavi Hernandes yagiye mu gihugu cya Iran inshuro eshatu ubwo yari akiri mu ikipe ya Al Sadd yo muri Qatar. Bitewe n'umubano wa Leta zunze ubumwe za America na Iran utameze neza, Xavi arasabwa gutanga ibyandiko zisobanura neza ingendo ze muri Iran.
Xavi arasabwa inyandiko zisobanura neza ingendo ze muri Iran(Image:Getty)
Biteganyijwe ko umukino wa FC Barcelona na Inter Miami uzatozwa n'umuvandimwe wa Xavi Hernandez witwa Oscar Herandez, naho we akazatoza umukino Barcelona izakina na Real Madrid mu mpera z'icyumweru muri Las Vegas.
Abakinnyi batanu ba FC Barcelona ntibajyanye n'ikipe ndetse byitezwe ko bazashaka aho bakina mu mwaka utaha w'imikino. Abo ni umuzamu Neto, ba myugariro Samuel Umtiti na Oscar Mingueza, Riqui Puig ukina hagati mu kibuga, ndetse na rutahizamu Martin Braithwaite.
Abakinnyi 28 FC Barcelona yajyanye muri iyi mikino yo kwitegura umwaka w'imikino ni Ter Stegen, Dest, Pique, Araujo, Busquets, Dembele, Pedri, Memphis, Ansu Fati, Nico, Jordi Alba, Ferran Torres, Sergi Roberto, Frenkie de Jong, Eric Garcia, Aubameyang, Gavi, Inaki Pena, Pjanic, Collado, Kessie, Christensen, Raphinha, Arnau Tenas, Pablo Torre, Balde, Abde na Casado.
Nyuma yo gukina na Inter Miami na Real Madrid, Barcelona izakina na Juventus tariki 26 Nyakanga 2022 i Dallas, isoze ikina na New York Redbull tariki 31 Nyakanga 2022.
