Muri mutarama nibwo uyu rutahizamu w'umwongereza Mason Greenwood yatawe muri yombi aho yashinjwaga ibyaha byo gufata ku ngufu, gukubita no gukomeretsa uwari umukunzi we ariwe Harriet Robson, nyuma y'amashusho uyu mukobwa yashyize hanze.
Nyuma y'iminsi mike nibwo uyu mukinnyi wa Manchester United yishyuye amafaranga ngo akurikiranwe ariko ari hanze adafunze(bail) dore ko amategeko abyemera. Greenwood yahawe kugeza tariki 30 Mata 2022, byumvikane ko ari kuri uyu wa Gatandatu.
Kuri ubu Police yo mu mujyi wa Manchester yamaze gutangaza ko uyu mugabo ataributabwe muri yombi nanone kuko igihe yahawe cyamaze kongerwa, ndetse muri Kamena 2022 akaba aribwo azagezwa imbere y'ubushinjacyaha.
Greenwood azaburanishwa muri Kamena(Image:Reuters)
Ubutumwa Police yo mu mujyi wa Manchester yashyize hanze buragira buti:"Amakuru agezweho ku iperereza ry'ibijyane no gufata ku ngufu nyuma y'amashusho yashyizwe ku mbuga nkoranyambaga muri Mutarama.
"Dukomeje gukora iperereza kuri raporo yatugejejweho ku Cyumweru tariki 30 Mutarama y'amafoto na videwo byashyizwe ku mbuga nkoranyambaga n'umugore uvuga ko yahohotewe.
"Uwo munsi umugabo w'imyaka 20 yatawe muri yombi akekwaho gufata ku ngufu no gukubita umugore, kumutera ubwoba bwo kwicwa, ndetse aracyari hanze(ku bw'amafaranga yishyuye). Ubusabe bwamaze gutangwa mu rukiko ko igihe cye cyakongerwa bikava ku wa Gatandatu tariki 30 Mata, ariko gusomerwa urubanza ntibyitezwe mbere yo muri Kamena.
"Ukekwa arakomeza kugendera ku mabwiriza ariko adafunzwe kugeza igihe azasomerwa urubanza mu rukiko. Ibizava mu rubanza cyangwa andi makuru, azatangazwa n'ibiro bishinzwe itangazamakuru bya Police ya Manchester."
Kuva Mason Greenwood yatabwa muri yombi yahise ahagarikwa muri Manchester United, ndetse n'ibindi bigo by'ubucuruzi bakoranaga bigenda bisesa amasezerano.
Uyu musore agomba gutegereza kugeza hagati mu kwezi kwa gatandatu kuko ariho biteganyijwe ko azaburanishwa, akaba yagirwa umwere cyangwa agahabwa ibihano akwiye mu gihe basanga ibyaha akurikiranweho bimuhama.
Mason Greenwood yazamukiye mu ikipe ya Manchester United. Yakinnye umukino we wa mbere mu ikipe nkuru muri Werurwe 2019, akaba yari amaze gukinira iyi kipe imikino 129, atsindamo ibitego 35.
