Aurélien Tchouaméni ni umusore w'Umufaransa w'imyaka 22 akaba akina mu ikipe ya AS Monaco mu Bufaransa. Uyu musore akina hagati mu kibuga ariko akaba akina afasha ba myugariro.
Ni umusore umaze iminsi avugwaho ko yifuzwa n'amakipe akomeye yo mu Bwongereza ariyo Chelsea, Liverpool na Manchester City, ariko kuri ubu n'ikipe ya Manchester United yinjiye muri iyo nkundura ishaka uyu musore.
Si ayo makipe gusa kandi, kuko bivugwa ko na Real Madrid yaba yifuza uyu musore ukiri muto bigaragara ko afite ahazaza heza mu mupira w'amaguru.
Amakuru ava mu Bufaransa avuga ko ikipe ya AS Monaco yamaze gushyira ahagaragara igiciro ikipe ishaka uyu musore ishobora kwishyura ubundi ikitwarira umukinnyi.
AS Monaco yizeye ko ikipe yaza yitwaje miriyoni 33 z'amapawundi bashobora kuba baganira ubundi bakarekura Aurélien Tchouaméni.
Manchester United ni ikipe imaze iminsi ivugwa ko yifuza umukinnyi wo hagati dore ko Umuhorandi Donny Van De Beek yasabye iyi kipe ko yamurekura.
Iyi kipe yavuzwe kandi kuri Jude Bellingham ukinira Borussia Dortmund yo mu Budage ndetse na John McGinn ukinira Aston Villa yo mu Bwongereza.
Ni mu gihe kandi Real Madrid nayo iri kureba uyu mukinnyi kugira ngo imugire umusimbura w'igihe kirekire ku mwanya ufitwe na Casemiro kugeza kuri ubu.
Umunya-Brazil Casemiro afite imyaka 29 ariko azuzuza imyaka 30 mu kwezi gutaha kwa Gashyantare.
Ikipe ya Chelsea nayo n'ubwo ifite Jorginho ukina uwo mwanya ariko ntisiba kuvugwa ko ikeneye undi mukinnyi aho ikunze kuvugwa kuri Declan Rice.
Aurélien Tchouaméni akinira AS Monaco mu Bufaransa(Image:90Min)
Tchouaméni arifuzwa n'amakipe menshi akomeye(Net-photo)
