Ku wa kabiri nibwo ikipe y'igihugu ya Senegal yatsinze ikipe y'igihugu ya Misiri(Egypt) igitego kimwe ku busa, mu giteranyo biba 1-1 kuko wari umukino wo kwishyura. Bitabaje penariti birangira ari penariri eshatu za Senegal kuri imwe ya Misiri, Senegal ihita ibona itike yo kujya mu gikombe cy'isi.
Gusa Abanya-Misiri ntibishimiye uko bafashwe muri uyu mukino dore ko bagiye bamurikwa amatoroshi y'icyatsi mu maso(lasers) byanaviriyemo Mohamed Salah guhusha penariti. Si ibyo gusa kuko ngo banakorewe irondaruhu mu ndirimbo zarirmbwaga n'abafana, bakanaterwa ibintu bitandukanye.
Abakinnyi ba Misiri bajujubijwe n'amatara y'icyatsi bamuritswe mu maso(Net-photo)
Nyuma y'uyu mukino FA yo muri Misiri bagize bati:"Ikipe y'igihugu yakorewe irondaruhu mu bimenyetso bitandukanye byavaga mu bafana bigana ku bakinnyi ba Misiri muri rusange, by'umwihariko Mohamed Salah."
Nyuma y'uko byavuzwe ko ishyirahamwe ry'umupira w'amaguru muri Misiri yagejeje ikirego muri FIFA, FIFA yatangaje ko igiye kubanza kwiga kuri raporo z'umukino ikabona kureba izindi ntambwe.
Mohamed Salah asohoka mu kibuga arinzwe kubera ibyo yaterwaga(Net-photo)
FIFA yagize iti:"FIFA iri kugenzura raporo z'umukino wo gushaka itike y'igikombe cy'isi wahuje Senegal na Egypt."
Amakuru y'ingenzi ari muri izi raporo aragenzurwa neza n'inzego zibishinzwe ku buryo ikipe y'igihugu ya Senegal ishobora no guhanwa basanze ari ngombwa koko.
