Umuvugizi wa Polisi ya Uganda Patrick Onyango yatangaje ko bafunze umugabo witwa Ddamulira Godfrey nyuma yo kumusangana uduhanga 24 tw'abantu aho bikekwako yabikoresha mu mihango yo gutamba ibitambo ku bantu.
Polisi yatangarije BBC ko uyu mugabo azaregwa bijyanye n'itegeko ryo kwirinda no kubuza gutamba ibitambo ku bantu, aho Onyango yemeje ko ibyo ashinjwa biramutse bimuhamye yakatirwa ifingungo cya burundu.
Uretse uduhanga 24 bamusanganye, yari anafite ibindi bice by'imibiri y'abantu hamwe n'iby'inyamaswa mu rusengero rwe ruherereye mu nkengero z'umurwa mukuru Kampala ndetse bakaba bakomeje gushakisha ibindi bice by'abantu nk'uko Onyango yabitangaje.
Godfrey watawe muri yombi, yavuze ko ari umuvuzi gakondo ukoresha imiti y'ibyatsi, icyakora ishyirahamwe ry'abavuzi gakondo ryamwihakanye rivuga ko ritamuzi.
Ntabwo ari ubwa mbere muri Uganda hagaragaye ibintu nk'ibi biteye ubwoba, dore ko mu kwezi kwashize polisi yongeye kugaragaza uduhanga 17 tw'abantu yakuye mu rusengero ruri mu Karere ka Mpigi.
