Kuri uyu wa 21 Ugushyingo 2024, mu butumwa bw'amashusho Perezida Zelensky yatangaje ko u Burusiya bwarashe misile karahabutaka yambukiranya imigabane izwi nka 'Intercontinental Ballistic Missile (ICBM)' mu gace Dnipro.
Igisirikare cya Ukraine kirwanira mu kirere cyatangaje ko u Burusiya bwarasiye iyo misile mu gace ka Astrakhan gaherereye mu ntera y'ibilometero 700 uvuye muri Dnipro harashwe.
Icyakora ntabwo basobanuye neza ubwoko bw'imitwe icyo gisasu cyari gitwaye, dore ko ICBM ifite ubushobozi bwo gutwara imitwe y'ibisasu kilimbuzi.
Nta n'ubwo kandi bavuze ibyo yangije, gusa Guverineri wa Dnipro Serhiy Lysak yavuze ko hangijwe uruganda rumwe, ndetse abantu babiri babikomerekeramo.
Ku runde rwa Moscow, abanyamakuru babajije umuvugizi wa Kremlin Dmitry Peskov iby'iki gitero, ababwira ko babaza muri Minisiteri y'ingabo nayo itaragira icyo ivuga.
Nubwo Ukraine yemeje ko ari ICBM yarashweho, abandi babihakanye, icyakora inzobera mu bya gisirikare zivuga ko bibaye byakozwa byaba ari ubwa Mbere mu mateka ya gisirikare izi misile zaba zirashwe mu ntambara kuko zisanzwe zigaragazwa mu kuzimurika gusa.
Dore muri Dnipro Ukraine ivuga ko harashwe ICBM
Ikinyamakuru cyo muri Ukraine Ukrainska Pravda, cyavuze ko gifite amakuru ko misile yarashwe ari iyo bita RS-26 Rubezh nayo iri mu bwoko bwa ICB ikaba ishobora kurasa muri kilometero 5,800 nk'uko bivugwa na Arms Control Association.
Iyi misile yarangije gukorwa mu 2012, ikaba iri mu byiciro bitandukanye aho ishobora no kurasa mu ntera iringaniye nko muri kilometero 5,500 nk'uko Reteurs dukesha iyi nkuru ibyandika.
Ntabwo ari igitero cya ICBM u Burusiya bwakoze gusa, kuko bwanakoresheje izindi misile zisiga ijwi za Kinzhal hypersonic missile na Kh-101 cruise missile aho Ukraine ari kwigamba ko hari izo yahanuye.
Iki kigero cy'u Burusiya cyavugishije benshi, kije gikurikira ibitero bya misile Ukraine imaze iminsi irasa mu Burusiya nyuma yo gukomorerwa n'Abanyamerika.
Iyi ntambara yamaze kuzuza iminsi 1000 irwanwa, iri kugana mu kuba u Burusiya bwakitabaza intwaro kilimbuzi, kurasa izi ICBM benshi bakemeza ko ari ho byerekeza habura igitonyanga cya nyuma.
Ukraine iremeza ko u Burusiya bwarashe muri Dnipro bakoresheje ICBM
Dore misile za ICBM u Burusiya butunze Ukraine ivuga ko barashweho
