Nyuma y'urutonde rurerure ishyirahamwe ry'umupira w'amaguru mu Rwanda FERWAFA yari yashyize hanze, ubu amakuru ahari aravuga ko umunya-Espagne w'imyaka 46 witwa Carlos Alós Ferrer ariwe mutoza mushya w'ikipe y'igihugu Amavubi n'ubwo ataratangazwa ku mugaragaro.
Ni umugabo wavukiye muri Espagne mu gace ka Tortosa, ndetse akaba yaranatangiriye gukina umupira nkuwabigize umwuga muri iyi kipe ya CD Tortosa aho yayikiniye mu 1993 kugeza mu 1995, akaba yari umuzamu.
Uyu mugabo wakunze gukina mu byiciro byo hasi yahagaraitse gukina umupira w'amaguru nk'uwabigize umwuga mu 2008 aho yakinaga mu ikipe ya Jesus Catalonia yo muri Espagne.
Mu 2008 nibwo Carlos Alós yahawe akazi ko gutoza ikipe ya CD Tortosa yanakiniye ubwo yari akiri umukinnyi, ariko tariki 11 Mutarama muri 2009 yahise yegura kuri aka kazi. Mu 2010 nibwo bwa mbere yagiye gutoza hanze ya Espagne, aho yahawe kazi mu ikipe ya Kitchee SC mu kiciro cya mbere muri Hong Kong ariko akaba yari umwungiriza w'umutoza Josep Gombau.
Mu 2010 Calros Alós yahise ava muri Hong Kong aho yerekeje mu mujyi wa Warsaw muri Poland muri akademi y'ikipe ya FC Barcelona ihari. Tariki 16 Mutarama 2015 yahise ahabwa ikipe ya Pogon Siedlce muri Poland, ariko ahita ayivamo muri gicurasi. Byumvikane ko yamazemo amezi asaga ane gusa.
Muri Kanama 2015 uyu mugabo yerekeje muri Kazakhstan aho yafashaga iki gihugu mu bijyanye no kuzamura abato, ndetse muri Mutarama 2017 yahise agirwa umutoza w'ikipe y'igihugu y'abatarengeje imyaka 17. Tariki 26 Nyakanga muri uwo mwaka, Carlos Alós yatangajwe nk'umutoza w'ikipe ya FC Kairat muri icyo gihugu, bemeranya gusoza uwo mwaka w'imikino.
Tariki 28 Ugushyingo 2017, Carlos Alós yemeranyije na Kairat kongera amasezerano y'imyaka ibiri, ariko aza gutandukana nayo muri Kanama 2018 nyuma y'ubwumvikane.
Tariki 20 Mutarama 2019 uyu mutoza yasinye mu ikipe ya Far Rabat yo muri Maroc. Iyi nayo batandukana tariki 10 Kamena 2019, nyuma y'ukwezi kumwe gusa asinye andi masezerano y'imyaka ibiri, asiga iyo kipe ku mwanya wa 13 muri shampiyona ya Botola league.
Ntiyatinze kubona akandi kazi kuko tariki 14 Kamena 2019 yahise ahabwa akazi na SC Qatar aho yasinye imyaka ibiri, ariko yahise asimburwa na Wesam Rizik atanasoje igice cya mbere cya shampiyona kubera umusaruro muke.
Mu ukwakira 2020 nibwo Carlos Alós yahawe akazi n'ikipe ya Enosis Neon Paralimni FC yo muri Cyprus, atangira nabi aho yatsinzwe imikino ine ya mbere, nyuma.aza no gutandukana nayo.
Carlos Alós Ferrer witezweho kuba umutoza w'Amavubi(Net-photo)
