Ikipe ya Tottenham yamaze kumenyesha Manchester United ko igomba kurekura miliyoni zirenze 100 z'amapawundi kugira ngo ibashe gusinyisha Harry Kane mu mpeshyi.
Harry Kane yifuzwaga cyane na Manchester City mu mpeshyi ya 2021 ariko birangira atavuye muri Tottenham. Uyu musore uyu mwaka w'imikino nurangira araba yinjiye mu mwaka wa nyuma ku masezerano ye azarangira mu mpeshyi ya 2024.
Inkuru dukesha ikinyamakuru The sun, iravuga ko kuri iyi nshuro Manchester United ariyo yabajije iby'uyu mwongereza ndetse abo muri Tottenham bakaba bayimenyesheje akavagari isabwa ngo ibashe kumusinyisha.
Ikipe ya Tottenham ntishaka kugirana ibiganiro birebire n'ikipe iyo ariyo yose ishaka Harry Kane, ndetse ntabwo yifuza kuba yamugurisha mu ikipe bahurira muri Premier League, bityo Bayern Munich na Real Madrid bivugwa ko zishobora kwinjira mu nkundura yo gushaka uyu rutahizamu.
Si umukinnyi wa mbere Manchester United yaba ikuye muri Tottenham kuko yaguzeyo abandi bakinnyi nka Teddy Sheringham, Michael Carrick na Dimitar Berbatov bayifashije bikomeye mu bihe byiza yagiye igira mu myaka yashize.
N'ubwo Manchester United yashoye amafaranga menshi mu mpeshyi ishize, iyi kipe yagize ikibazo gikomeye muri uyu mwaka w'imikino cyo kubura rutahizamu aho yagiye itwarwa na Marcus Rashford ukunda gusatira anyuze ku ruhande.
Harry Kane arifuzwa n'amakipe akomeye i Burayi(Net-photo)
