Cristiano Ronaldo ni inzozi mbi kuri Atletico Madrid izahura na Manchester United

Cristiano Ronaldo ni inzozi mbi kuri Atletico Madrid izahura na Manchester United

 Dec 13, 2021 - 15:18

Imibare igaragaza ko Atletico Madrid yagiye yibasirwa na Cristiano Ronaldo aho bahuriye cyane cyane muri champions league.

Kuri uyu wa mbere nibwo hari hateganyijwe tombora ya kimwe cya munani cya UEFA champions league ku makipe yashoboye kurenga amatsinda.

Hakozwe tombora ebyiri nyuma y'uko hagaragaye amakosa yatumye tombora ya mbere iseswa bemeza ko bongera gutombora.

Tombora ya kabiri yarangiye byemejwe ko Manchester United yo mu Bwongereza izahura na Atletico Madrid yo muri Espagne.

Imibare igaragaza ko mu nshuro Atletico Madrid yagiye ihura n'amakipe arimo Cristiano Ronaldo itigeze yoroherwa kuko akenshi irahurika cyane ku ruhare runini rwa Ronaldo.

Kuva mu 2014 kugeza mu 2019 inshuro Atletico Madrid yagiye ivamo muri champions league, yakurwagamo n'ikipe irimo Cristiano Ronaldo.

Cristiano Ronaldo yagize uruhare cyane ku mikino ya nyuma yo mu 2014 no mu 2016 aho Real Madrid ya Cristiano yabaga yahuye na Atletico Madrid bikarangira igikombe gitwawe na Real Madrid.

Mu 2018 ubwo Cristoano Ronaldo yajyaga muri Juventus yongeye guhura na Atletico Madrid muri kimwe cya munani. Umukino ubanza muri Espagne, Atletico Madrid yatsinze Juventus ibitego 2-0.

Mu mukino wo kwishyura Cristiano Ronaldo yatsinze ibitego bitatu ndetse umukino urangira Juventus itsinze Atletico Madrid ibitego 3-0 maze Atletico irasezererwa.

Mu mikino 35 Cristiano Ronaldo amaze guhuramo na Atletico Madrid. Yatsinzemo ibitego 25 anatanga imipira 9 yavuyemo ibitego.

Cristiano Ronaldo kandi yatsinze hat-trick eshatu ahura na Atletico Madrid mu nshuro zose bahuye.

Uyu mugabo kandi w'imyaka 36 niwe ufite ibitego byinshi muri iri rushanwa kuva ryabaho kuko amaze gutsinda ibitego 140 muri iri rushanwa rya UEFA champions league aho arusha mugenzi we Lionel Messi ibitego 15.

Tombora kandi yarangiye byemejwe ko amakipe azahura ku buryo bukurikira:

RB Salzburg - Bayern Munich

Sporting CP - Manchester City

Benfica - Ajax

Chelsea - Lille

Atletico Madrid - Manchester United

Villarreal - Juventus

Inter.Milan - Liverpool

PSG - Real Madrid

Iyi mikino izagaruka tariki 15 Gashyantare mu 2022, amakipe azakomeza azahita abona itike yo gukina kimwe cya kane mu gushaka uzatwara iki gikombe cya 2021-2022.

Cristiano Ronaldo agora cyane Atletico Madrid ya Diego Simeone(Image:SB nation)