Perezida Kagame yasheshe Inteko Ishinga Amategeko, yibutsa n'abayobozi barahiye ko nta muntu kampara ubaho

Perezida Kagame yasheshe Inteko Ishinga Amategeko, yibutsa n'abayobozi barahiye ko nta muntu kampara ubaho

 Jun 14, 2024 - 14:00

Kuri uyu wa Gatanu Perezida Paul Kagame yasheshe Inteko Ishinga Amategeko Umutwe w’Abadepite, yakira n'indahiro z’abayobozi bashya baherutse kwinjira muri Guverinoma no mu zindi nzego nkuru z’Igihugu, abibutsa ko babwiye kuzuza inshingano kandi ko nta muntu kampara ubaho.

Kuri uyu wa 14 Kamena 2024, Perezida Kagame ari mu Ngoro y’Inteko Ishinga Amategeko y'u Rwanda yakiriye ndahiro z’abayobozi bashya baherutse kwinjira muri Guverinoma no mu zindi nzego nkuru z’Igihugu.

Umukuru w'Igihugu yavuze ko abayobozi cyangwa abandi bahabwa inshingano bakwiye kujya bibuka ko hari impamvu bazishyizwemo ngo bahagararire abandi.

Ati “Nta muntu n’umwe kampara, iyo wagiye mu mwanya w’ubuyobozi ntabwo wireba, uba wagiyemo kubera impamvu, haba hashobora kujyamo undi. Abanyarwanda ni benshi, ugomba kwibaza ko wagiyemo kubera impamvu."

Yunzemo ko umuntu wese uhabwa inshingano, aba agomba kuzirikana ko atagomba kwirebaho wenyine ahubwo agomba guhora atekereza ku nshingano yahawe n’abo ahagarariye.

Ati “Ni yo mpamvu rero, ubona rimwe na rimwe ibintu bituzuzwa uko bikwiye, kenshi, henshi ndibwira ko uyu aba ari umwanya wo kubibutsa. Ikindi, abayobozi ntabwo bagiraho ikuzo, kwitekereza gusa, ibyo ni ibintu bizima bisanzwe, kwitekerezaho, ariko no gutekereza inshingano n’impamvu ufite izo nshingano. Ikindi ni ugukorera abandi, Igihugu n’abatari muri uwo mwanya."

Abayobozi barahiye barimo Minisitiri w’Ububanyi n’Amahanga n’Ubutwererane, Amb Olivier Nduhungirehe, Minisitiri w’Uburinganire n’Iterambere ry’Umuryango, Uwimana Consolée na Minisitiri w’Imari n’Igenamigambi, Yusuf Murangwa, Umunyamabanga wa Leta ushinzwe Ishoramari rya Leta no kwegeranya Imari, Mutesi Rusagara n’Umunyamabanga wa Leta muri Minisiteri y’ibikorwaremezo, Kabera Olivier.

Perezida Kagame kandi, yasheshe ku mugaragaro Inteko Ishinga Amategeko, Umutwe w’Abadepite, ashimira abari bayigize.

Ati “Gusesa Inteko ntabwo bivuze kubagaya, ni igihe kigeze cy’ibindi bishya tugomba kujyamo ariko uyu munsi byari ibyo kubashimira no kubabwira ngo ni ah’ubutaha."

Manda ya kane y’Umutwe w’Abadepite yatorewe igihe cy’imyaka itanu yatangiye ku itariki ya 19 Nzeri 2018 umunsi Abadepite barahiriye imbere ya Perezida wa Repubulika.

Muri iyi manda, mu Badepite 80, bari bagize Umutwe w’Abadepite, 61.3% ni abagore.

Mu bikorwa byakozwe muri iyi manda, harimo gushyiraho amategeko, aho Umutwe w’Abadepite wasuzumye unatora amategeko 392, arimo Itegeko Nshinga rya Repubulika y’u Rwanda, amategeko ngenga 10 n’amategeko asanzwe 381