Iyi ni Hotel yari iherereye mu mujyi wa Kigali ku musozi wa Rebero, aha akaba ariho haberaga inama zitegura Jenoside ndetse hagafatirwa ibyemezo bikozwe n'ishyaka rya MRND ryari riri ku butegetsi icyo gihe.
Inama zikomeye zahaberaga zikitabirwa n'Abanyapolitike bakomeye, ni ikimenyetso simusiga ko umugambi mubisha wo gutsemba Abatutsi wateguwe na Guverinoma yari iri ku butegetsi ndetse babikwirakwiza mu baturage.
Zimwe mu nama zikomeye zabereye muri iyi Hotel
Nk'uko byatangajwe na Minisitiri w'Ubumwe bw'Abanyarwanda n'Inshingano Mboneragihugu, Dr. Bizimana Jean Damascene, izi ni zimwe mu nama zikomeye zagiye zibera muri iyi Hotel zose zigamije gutegura no gushyira mu bikorwa Jenoside.
Tariki ya 17 Ukwakira 1992, habereyemo inama yayobowe na Capt.Pascal Simbikangwa.
Iyi nama yafatiwemo icyemezo cyo gushaka abantu bose bari baravuye mu gisirikare bakinjizwa mu Nterahamwe.
Tariki ya 20 Ugushyingo 1993, habereyemo inama yayobowe na Perezida Habyarimana, hafatirwamo icyemezo cyo guha Interahamwe n’Impuzamugambi intwaro zagombaga gukoreshwa mu kwica Abatutsi n’abataravugaga rumwe n'ishyaka ryari riri ku butegetsi rya MRND na CDR.
Iyo nama kandi yari igamije gushyira mu bikorwa ibyari byemejwe n’indi yabaye mu Ukwakira 1993, igizwe ahanini n’abasirikare yari yaremeje ko bakomeza umugambi w’icyo bitaga uwo 'kwirwanaho'.
Icyo bitaga kwirwanaho no gushaka amahoro arambye, kwari ugutsemba Abatutsi nk'uko byari byaratangajwe na Perezida Habyarimana mu 1991. Abatari bashyigikiye Interahamwe kandi bagombaga kwicwa hibanzwe ku batuye i Kigali.
Tariki ya 27 Gashyantare 1994, kuri Hotel Rebero l’Horizon habereye inama yahuje abayobozi bakuru b’Interahamwe, initabirwa n’abandi bari bakomeye nka Michael Bagaragaza, wayoboraga Ikigo cy’Igihugu cyari gishinzwe Ubucuruzi bw’icyayi na Joseph Nzirorera wari Umunyamabanga Mukuru wa MRND.
Yitabiriwe kandi na Augustin Ngirabatware wari Minisitiri w’Igenamigambi, Claver Mvuyekure wari Umuyobozi Mukuru wa Banki ya Kigali, Pasiteri Musabe wari Umuyobozi Mukuru wa BACAR.
Hari kandi Seraphin Rwabukumba wari umwe mu bayobozi bakuru ba Banki Nkuru y’Igihugu akaba na muramu wa Perezida Habyarimana ndetse na Robert Kajuga wari Umuyobozi Mukuru w’Interahamwe.
Iyi nama yemeje ko bagiye gushaka amafaranga yo gushyigikira Intehamwe mu rwego rwo gutsemba Abatutsi, ari nayo mpamvu hari hatumiwemo abayobozi b’Amabanki.
Hotel Rebero l'Horizon' yahoze ari iya Perezida Habyarimana
