Ni umwe mu bantu bakurikirwa cyane ku mbuga nkoranyambaga mu mwaka wa 2025, aho afite abamukurikira barenga miliyoni 81.9 ku mbuga nkoranyambaga zitandukanye kubera ubuhanga bwe mu gutangaza amakuru y’igura n’igurisha ry’abakinnyi hirya no hino ku Isi no kutibeshya ku nkuru.
Nk’uko ubushakashatsi bwakozwe n'urubuga rwitwa 'Hafi' rwakoresheje uburyo bwihariye bushingira ku mibare y’abamukurikira, uko abantu bitabira ibyo ashyira hanze n’imibare y’ababireba, Fabrizio Romano yinjije hagati $298,826 na $416,158 mu kwezi kumwe binyuze kuri Instagram, TikTok na YouTube.
Mu mwaka wa 2023, urubuga rwa "Notus" rwari rwagaragaje ko Romano yinjiza hafi $86,780 binyuze kuri X (Twitter).
Mu gihe ikinyamakuru Wtfoot cyatangaje ko umutungo wa Fabrizio Romano ubarirwa muri miliyoni $2.1 mu 2023. Kuri ubu binyuze mu mishinga itandukanye, Romano yinjiza hagati ya miliyoni $3.5 na miliyoni $4.9 buri mwaka.
Romano yatangiye itangazamakuru mu kinyarwanda TuttoMercato atangaza inkuru ye ya mbere ku myaka 18, mbere yo kujya gukorana na Sky Sport Italia ndetse na Gianluca Di Marzio.
Yaje gutangiza umushinga we bwite, uza kugenda utera imbere cyane kugeza ubwo yaje gushyirwa mu rutonde rwa Forbes rwa "30 Under 30" (urutonde rw'abantu mu ngeri zindukanye bageze ku bintu bihambaye ku Isi munsi y'imyaka 30).
Uyu mugabo uzwi cyane ku ijambo “Here we go!” wabaye umuntu w’ingenzi mu gutangaza amakuru y’igura n’igurisha ry’abakinnyi bakomeye ku Isi, uretse gukorana na CBS Sports Golazo, Sky Sports, The Guardian ndetse n’ibindi bigo, bizwiho kwinjiza agatubutse.
Romano ubwo yaganirizwaga ari kubazwa uburyo abasha gukora ibyo akora cyane mu gihe k'isoko ry'igura n'igurisha ry'abakinnyi, avuga ko icyo gihe bimusaba kuryama amasaha atarenze atanu ku munsi.
Fabrizio Romano yemeza ko aryama byibuze amasaha atanu ku munsi
Fabrizio Romano yahawe ibihembo bitandukanye kubera akazi akora mu itangazamakuru
