Ikipe y'igihugu ya Portugal iyobowe na Cristiano Ronaldo iri mu bibazo byo kuba ishobora kubura itike yo kujya mu gikombe cy'isi, nyuma y'uko inaniwe kuyobora itsinda A yarimo nyuma yo gutsindwa na Serbia.
Mu mikino ya kamarampaka, ikipe ya Portugal igomba kubanza gukuramo Turkey mbere y'uko igera mu kiciro cya nyuma aho amahirwe menshi aruko izahura n'Ubutaliyani bwatwaye igikombe cya Euro giheruka.
Cristiano Ronaldo yifashishije urukuta rwe rwa Instagram yandika ati:"Umutima wose ku gikombe cy'isi cya 2022. Ntewe ishema no guhora mpagarariye Portugal. Turabizi ko inzira itazigera yoroha, twubaha abo tuzahura nabo bafite intego nk'izacu. Ariko, dushyize hamwe tuzarwana ngo dushyire Portugal mu mwanya ukwiye. Reka ibi tubikore."
Cristiano Ronaldo amaze gutsinda ibitego birindwi mu bikombe by'isi bine amaze gukina, ndetse uyu mugabo w'imyaka 37 ni uwa kabiri mu bamaze gutsindira Portugal ibitego byinshi mu gikombe cy'isi. Ronaldo ni uwa kabiri nyuma ya Eusebio watsinze ibitego ikenda.
Ikipe y'igihugu ya Portugal igiye gukina na Turkey ifite ibibazo by'abakinnyi batandukanye. Joao Cancelo na Renato Sanches bafite ibibazo by'amakarita, Ruben Dias na Nelson Semedo ntibameze neza kuko bafite imvune, myugariro Pepe arwaye Covid-19 ndetse na Ruben Neves aherutse kugira akabazo mu mukino Wolves yakinnye ku wa gatanu.
Cristiano Ronaldo yakinnye umukino we wa mbere mu ikipe y'igihugu ya Portugal muri Kanama 2003 ubwo bakinaga na Kazakhstan. Uyu mugabo amaze kuyikinira imikino 184 ndetse yayitsindiye ibitego 114.
Kure ikipe y'igihugu irimo Cristiano Ronaldo yageze mu gikombe cy'isi, ni mu gikombe cy'isi cyabereye mu Budage mu 2006 aho yageze muri kimwe cya kabiri igatsindwa n'Ubufaransa igitego kimwe ku busa.
Ikipe ya Portugal ishobora gusabwa gukuramo Ubutaliyani ngo ijye mu gikombe cy'isi(Net-photo)
