Ni umukino wa Bundesliga wabaye kuri uyu wa Gatandatu aho Bayern Munich yari yasuye Freiburg ku kibuga Europa-park Stadion, ikayihatsindira ibitego 4-1.
Agashya kaje kuba muri uyu mukino nuko iyi kipe ya Bayern Munich yaje kumara amasegonda asaga ikenda ifite abakinnyi 12 mu kibuga, abantu bibaza uko byagenze birayoberana.
Aha icyabaye nuko ku munota wa 85 w'umukino, umutoza wa Bayern Munich Julian Negelsmann yafashe umwanzuro wo gukora impinduka agashyiramo Niklas Sule na Marcel Sabitzer waje no gutsinda igitego.
Ariko aho kugira ngo havemo abakinnyi babiri, havuyemo umukinnyi umwe ariwe Corentin Tolisso mu gihe Kingsley Coman yagumye mu kibuga nyuma y'uko herekanwe nimero 29 kandi yambara nimero 11. Mu kanya gato umukino ukomeje abo mu ikipe ya Freiburg baje kubivumbura babwira umusifuzi guhagarika umukino babanza kureba uko bimeze.
Bayern Munich yakinnye ari abakinnyi 12 mu kibuga
Muri raporo umusifuzi Christian Dingert yatanze yavuze ko ishyirahamwe ry'umupira w'amaguru mu Budage, DFB ariyo izafata icyemezo kuri ibi. Umutoza Julian Negelsmann we yagerageje gusobanura avuga ko amasegonda ikenda bakinnye ari 12 ntacyo avuze cyane mu gihe ikipe ye yari yamaze kubona ibitego bitatu.
Negelsmann yabwiye ikinyamakuru Bild ati:"Ni ibihe bidasanzwe. Umusifuzi wa kane yerekanye nimero itariyo bituma Kingsley Coman atamenya ko akwiye kuva mu kibuga. Ariko nta kintu gikaze cyabaye."
