Hashize igihe bivugwa ko rutahizamu w'umunya-Portugal, Cristiano Ronaldo, ashaka kuva muri Manchester United nyuma y'umwaka umwe ayigarutsemo, akaba ashaka kwerekeza mu ikipe izakina Champions league umwaka utaha w'imikino 2022- 2023.
Umutoza wa Manchester United, Erik Ten Hag, yakomeje gushimangira ko uyu mugabo ari muri gahunda ze ndetse akaba yitezweho ko ariwe uzaba ayoboye ubusatirizi bw'ikipe ye. Gusa nanone bivugwa ko Ronaldo yamaze kumumenyesheje icyifuzo cye cyo kugenda akava i Manchester.
Nyuma y'ibi perezida wa Atletico Madrid yaje kumvikana avuga ko gusinyisha Cristiano Ronaldo bidashoboka.
Aganira na El Partidazo de COPE, Enrique Cerezo yagize ati:" Sinzi uwahimbye iyo nkuru ariko kuza kwa Cristiano Ronaldo muri Atletico Madrid ntibishoboka."
Enrique Cerezo yemeza ko gusinyisha Ronaldo bidashoboka(Image:Marca)
Ibi uyu muyobozi abivuze nyuma y'andi makipe menshi yavuzwemo Cristiano Ronaldo ariko hakumvikana abayobozi bayo bavuga ko ari ibihuha ndetse bakemeza ko ayo makuru atariyo.
Umuyobozi wa siporo muri Bayern Munich, Hasan Salihamidzic yabwiye SPORT1 ati:"Nubaha cyane Cristiano Ronaldo, ibyo yagezeho ndetse n'umwuga we. Ariko na none: Ibyo ntibyari ingingo ndetse ntabwo ari ingingo kuri twe."
Chelsea yagaragaraga nk'ikipe bishoboka cyane ko Cristiano Ronaldo yakwerekezamo, ariko yo na Paris Saint-Germain zagaragaye nk'andi makipe ko zidashaka kumva inkuru y'uyu mugabo.
Indi kipe yashobokaga ariko ifite amahirwe make ni Sporting CP yo muri Portugal ndetse akaba ari nayo yamushyize ku itara, aho yayivuyemo yerekeza muri Manchester United bwa mbere mu 2003.
Gusa Ruben Amorim uyobora Sporting CP nawe mu magambo ye yumvikanishije ko ibyo kuba Cristiano Ronaldo yayigarukamo muri iyi mpeshyi nta mahirwe abiha.
Guhuza Atletico Madrid na Cristiano Ronaldo byaje nyuma y'uko iyi kipe yatakaje undi rutahizamu w'inararibonye muri iyi mpeshyi ariwe Luis Suarez, akaba yaravuye muri iyi kipe nyuma yo gusoza amasezerano ye.
Nubwo Ronaldo yatsinze ibitego byinshi muri uyu mwaka w'imikino ushize aho yatsinze ibitego 24, Manchester United yasoje shampiyona ku mwanya wa gatandatu ibura itike yo gukina Champions League . Ten Hag wavuye muri Ajax yizeye ko azasubiza iyi kipe mu makipe ane ya mbere ndetse hari abakinnyi yamaze kongera mu ikipe ye.
Tyrell Malacia yinjiyemo ava Feyenoord, Christian Eriksen yinjiye nyuma yuko amasezerano ye y'igihe gito muri Brentford yari arangiye ndetse iyi kipe yanasinyishije Lisandro Martinez wavuye muri Ajax.
Kuri uyu wa kabiri tariki 26 Nyakanga 2022, nibwo Cristiano Ronaldo yagarutse i Manchester nyuma y'igihe kitari gito abandi bakinnyi ba Manchester United batangiye imyitozo. Byitezwe ko aragirana ibiganiro n'umutoza Erik Ten Hag bakaganira ku hazaza he.
Mu gihe Cristiano Ronaldo n'umu-agent we Jorge Mendes babura ikipe ibakira, uyu rutahizamu yaguma i Manchester agahebera urwaje n'ingaruka nyinshi zizazanwa no kudakina UEFA Champions league.
Cristiano Ronaldo aracyashaka ikipe yerekezamo(Net-photo)
Ikipe ya Manchester United igomba gukata abakinnyi bayo 30% y'umushahara basanzwe bahembwa kuko batabonye itike ya Champions league. Uyu mugabo usanzwe ahembwa ibihumbi 485 by'amapawundi ku cyumweru, azisanga ahembwa asaga ibihumbi 340 by'amapawundi ku cyumweru.
Si ibi gusa kandi kuko n'ibigo by'ubucuruzi bisanzwe bikorana nawe bigomba kumukata amafaranga ku bwo kutagaragara mu irushanwa rikomeye rya Champions league, kandi ariryo rituma ibyo yamamaza bigaragara cyane.
