Amavubi yigishijwe umupira na Guinea Conakry aherutse kwandagaza

Amavubi yigishijwe umupira na Guinea Conakry aherutse kwandagaza

 Jan 6, 2022 - 14:34

Mu mukino wa kabiri wa gicuti , Guinea Conakry yatsinze u Rwanda ibitego 2-0 mbere yo kwerekeza muri Cameroon.

Kuri uyu wa mbere nibwo ikipe y'igihugu ya Guinea Conakry yari yakinnye umukino wa mbere wa gicuti n'Amavubi aho Syli National ya Guinea Conakry yari yatsinzwe ibitego 3-0.

Kuri uyu wa kane nibwo hakinwe umukino wa kabiri mbere y'uko ikipe ya Guinea Conakry yerekeza muri Cameroon, uyu mukino ukaba warangiye ari ibitego 2 bya Guinea ku busa bw'Amavubi.

Ni imikino ibiri yashyizweho mu rwego rwo gufasha Guinea Conakry kwitegura neza igikombe cya Afurika kigiye kubera muri Cameroon. Ibi byatekerejweho nyuma y'uko Guinea Conakry yari yahisemo gukorera imyiteguro mu Rwanda.

Ku ruhande rw'umutoza w'Amavubi ariwe Mashami Vincent, yari yakoze impinduka dore ko mu bakinnyi bari bakinnye umukino wa mbere yari yagaruyemo batanu gusa.

Mu izamu: Ishimwe Jean Pierre. Ba nyumgariro: Serumogo Ali, Buregeya Prince, Rutanga Eric na Faustin Usengimana.

Mu kibuga hagati: Ruboneka Bosco, Nishimwe Blaise na Benedata Janvier. Ba rutahizamu: Byiringiro Lague, Hakizimana Muhadjri na Sugira Ernest. 

N'ubwo Mashami Vincent yari yakoze izo mpinduka, ku ruhande rwa Guinea naho habayeho impinduka dore ko na Naby Keita ukinira Liverpool noneho yakinnye uyu mukino.

Igice cya mbere cyarangiye Guinea Conakry ifite ibitego bibiri ku busa bw'Amavubi. Igitego cya mbere cyatsinzwe na Mohamed Bayo ku munota wa 26' naho ku munota wa 34' Naby Keita atsinda icya kabiri.

Ni ikipe ya Guinea Conakry byagaragaraga ko yivuguruye ugereranyije n'umukino ubanza ubwo yatsindwaga ibitego 3-0.

Gusa n'ubwo igice cya mbere Amavubi yarushijwe cyane, mu gice cya kabiri habayeho impinduka birangira yihagazeho. Aha twavuga nk'aho umuzamu Jean Pierre yavuyemo hakinjira Ntwari Fiacre.

Guinea Conakry igomba guhita ifata indege ikerekeza muri Cameroon aho igikombe cya Afurika kibura iminsi mike ngo gitangire.

Guinea Conakry yatsinze Amavubi kuri uyu wa kane

Naby Keita yatsinze igitego cya kabiri.