Ku gicamunsi cyo kuri uyu wa Gatanu nibwo amakuru yagiye hanze avuga ko Sergio Kun Agüero, rutahizamu wa FC Barcelona na Argentina, yaba agiye kumanika inkweto kubera indwara ya arrhythmia ituma umutima utera nabi.
Sergio Aguero ntiyatinze yahise agira icyo avuga kuri ayo makuru yari amaze kubabaza imitima y'abakunzi ba ruhago ku isi yose.
Sergio Aguero urwaye umutima(Image:Barca Blaugranes)
Uyu rutahizamu w'umunya Argentine yavuze ko ubu ibintu biri kujya mu buryo kandi ko arigukurikiza inama z'abaganga umunsi ku wundi kuva yasohoka mu kibuga ku munota wa 41 ku mukino Barca yakinaga na Alaves ababara mu gatuza.
Sergio Aguero yabwiwe ko agomba kumara amezi agera kuri atatu aruhuka kandi avuga ko azabyubaha kugeza bakoze ibindi bizami bakareba uko ahagaze.
Ibi byaje nyuma y'uko kuri uyu wa Gatanu Radio ya Catalunya yari yatangaje ko ikibazo gikomeye kurenza uko twabikekaga mbere y'isuzuma ry'abaganga.
Radio ya Catalunya yavuze ko inama yo kureka umupira iri mu nama Aguero yagiriwe n'abaganga mu rwego rwo kwirinda ibibazo byakurikiraho.
Sergio kun Aguero yagiye ku rubuga rwe rwa twitter yandika agira ati:" Ibyo ni ibihuha. Ndashaka kubabwira ko ndi gukurikiza amabwiriza y'abaganga kandi bansuzuma nkanavurwa umunsi ku wundi. Tuzareba uko bizaba bimeze nyuma y'iminsi 90. Ndakeka bizamera neza."
Sergio Aguero ku mukino wa Alaves(Image:BBC)
Sergio Aguero yagiye mu ikipe ya FC Barcelona mu mpeshyi ishize nyuma yo gusoza amasezerano ye mu ikipe ya Manchester City.
Yatangiranye imvune bituma adakinira FC Barcelona mu ntangiro za shampiyona. Ku mukino wa Alaves nibwo yasohotse mu kibuga ababara mu gatuza birangira ahawe amezi atatu adakina.
