Cristiano Ronaldo yatambamiye iyinjira rya Antonio Conte muri Manchester United

Cristiano Ronaldo yatambamiye iyinjira rya Antonio Conte muri Manchester United

 Jun 3, 2022 - 19:36

Rutahizamu w'umunya-Portugal Cristiano Ronaldo yabaye impamvu ikomeye yatumye umutoza Antonio Conte aterekeza muri Manchester United.

Antonio Conte yari umwe mu batoza bahabwaga amahirwe menshi yo gusimbura Ole Gunnar Solskjaer muri Manchester United, mbere y'uko iyi kipe iha amasezerano y'amezi atandatu Ralf Rangnick.

Bivugwa ko mu kwezi kwa cumi ubwo umutoza Ole Gunnar Solskjaer yendaga kwirukanwa, Cristiano Ronaldo yabajijwe icyo atekereza ku guha akazi Antonio Conte.

Amakuru atangwa n'ikinyamakuru Manchester Evening News avuga ko iki gitekerezo cyamaganiwe kure n'uyu rutahizamu w'umunya-Portugal.

Cristiano yanze ko Antonio Conte atoza Manchester United(Image:Getty)

Nibwo byaje kurangira Manchester United ihaye akazi umudage Ralf Rangnick nk'umutoza w'agateganyo, nyuma yo gusinya amasezerano y'amezi atandatu.

Rangnick yari yitezweho kuzahura iyi kipe byibuze akayifasha kuza mu makipe ane ya mbere muri Premier league biyemerera kuzakina UEFA  Champions league, ndetse akayifasha no guhitamo umutoza w'igihe kirekire.

Gusa uyu mudage ntibyamuhiriye muri iyi kipe kuko yasoje shampiyona ari ku mwanya wa gatandatu n'amanota 58 yonyine, ndetse abasha gutsinda imikino ibiri yonyine mu mikino ikenda ya nyuma.

Byarangiye Antonio Conte agiye muri Tottenham (Image:PA)

Ni mu gihe ku rundi ruhande mu kwezi kwa 11 Antonio Conte yemejwe nk'umutoza wa Tottenham Hotspurs, nyuma y'ibyo biganiro byahuje Cristiano n'abayobozi ba Manchester United bakemeza kutamuha akazi.

Ikipe ya Tottenham yari yatangiye nabi umwaka w'imikino iri kumwe na Nuno Espirito Santo, Conte yabashije kuyishyira mu makipe ane ya mbere ibona itike yo kuzakina UEFA Champions league.