Dani Alves wakinanye na Messi hari umukinnyi yari guha Ballon d'or utari Lionel Messi

Dani Alves wakinanye na Messi hari umukinnyi yari guha Ballon d'or utari Lionel Messi

 Nov 30, 2021 - 12:54

Dani Alves yatangaje abantu avuga ko Ballon d'or we yari kuyiha Christian Eriksen.

Lionel Messi yaraye ahawe Ballon d'or ya 2021 ikaba iya karindwi kuri we aho yari ahatanye n'abakinnyi nka Jorginho,Robert Lewandowski na Karim Benzema.

Lionel Messi yatwaye Ballon d'or ya 7(Image:Telegraph)

Gusa n'ubwo abenshi batabivugaho rumwe,utemera ko Messi yari ayikwiye byibuze avuga Robert Lewandowski cyangwa Jorginho.

Umunya-Brazil witwa Dani Alves wakinanye na Lionel Messi igihe kinini muri FC Barcelona yatangaje abantu avuga ko yari kuyiha Christian Eriksen umunya-Denmark ukinira Inter.Milan.

Christian Eriksen yaguye mu kibuga mu mukino wa Euro2020 wahuzaga ikipe ye ya Denmark na Finland kubera ikibazo cy'umutima none n'ubu ntaremererwa kugaruka mu kibuga gukina.

Christian Eriksen umunya-Denmark ukinira Inter.Milan(Image:UEFA)

Dani Alves yagize ati:"Ndabizi ko Lionel Messi yari afite amahirwe menshi yo guhabwa Ballon d'or."

"Yari afite ibishoboka byose ngo yongere kubikora.Ariko mu by'ukuri uyu mwaka ibihembo byose by'umukinnyi ku giti cye byari bikwiye guhabwa Christian Eriksen kuko tugomba gutanga ubutumwa ku isi ko ubuzima ari ingirakamaro kurenza umupira w'amaguru."

Christian Eriksen yaguye mu kibuga kubera umutima(Image:Marca)

Christian Eriksen ntago aremererwa n'abaganga kugaruka mu kibuga dore ko n'amabwiriza yo muri Serie A atamwemerera gukina mu Butariyani mu gihe yagize iki kibazo.

Dani Alves nyuma y'imyaka myinshi avuye muri FC Barcelona aherutse kugarukamo ariko ntarabona ibyangombwa bimwemerera gukinira FC Barcelona.