Nyuma yo gukatirwa imyaka ibiri ashinjwa gukoresha inyandiko mpimbano, Bagirishya jean de Dieu uzwi nka Jado Castar yarajuriye none yahawe igihano cy'amezi umunani.
Castar yatawe muri yombi ku wa 20 Nzeri 2021. Yahise aburanishwa mu mizi hatabayeho ko aburana ifunga n’ifungurwa ry’agateganyo kuko yaburanye yemera icyaha, anagisabira imbabazi.
Jado Castar usanzwe ari Visi Perezida wa Kabiri ushinzwe Amarushanwa mu Ishyirahamwe nyarwanda ry’Umukino wa Volleyball (FRVB), yakatiwe imyaka ibiri n’Urukiko Rwisumbuye rwa Gasabo ku wa 13 Ukwakira 2021, ahamijwe icyaha cyo gukoresha inyandiko mpimbano.
Uyu mugabo usanzwe ari umunyamakuru w’imikino akaba na nyiri B&B FM- Umwezi, yahamijwe icyaha cyo gukoresha inyandiko mpimbano ubwo Ikipe y’Igihugu y’u Rwanda y’Abagore yari mu Gikombe cya Afurika cya Volleyball cyabereye i Kigali hagati ya tariki ya 10 n’iya 20 Nzeri 2021, ishinjwa gukinisha abakinnyi bakomoka muri Brésil batujuje ibisabwa.
Gukurwa mu irushanwa kw’Ikipe y’Igihugu y’Abagore byatumye FRVB ihagarikwa by’agateganyo n’Ishyirahamwe Mpuzamahanga ry’Umukino wa Volleyball (FIVB) ndetse haracyategerejwe umwanzuro ntakuka uzafatirwa u Rwanda.
Uru rubanza rw'ubujurire rwagiye rusubikwa inshuro zinyuranye, ndetse ubuheruka ni ku wa 25 Gashyantare 2022 aho umucamanza yanzuye ku rushyirwa tariki 07 Werurwe 2022. Uru rubanza rero rwaje kuba noneho ndetse birangira Castar wari warakatiwe amezi 24, akatirwa amezi umunani gusa.
Jado Castar yagabanyirijwe igihano gishyirwa ku gifungo cy'amezi umunani(Net-photo)
