Ubuyobozi bwa UEFA bwatangaje ko ikipe ya Chelsea yaciwe ihazabu ya miliyoni €31 (angana na miliyari 42.3 mu mafaranga y’u Rwanda) itagira icyo yishingirwaho, ariko iyi kipe ishobora kongererwa amande ya miliyoni €60 (miliyari 81.9 Frw) mu gihe itazubahiriza amabwiriza mashya yashyizweho. Barcelona yo yaciwe miliyoni €15 (miliyari 20.4 Frw) mu gihe Aston Villa yo izishyura miliyoni €11 (miliyari 15 Frw).
Aya mande y’inyongera (conditional fines) yashyizweho nk’amasezerano hagati y’aya makipe na UEFA, aho Chelsea izagengwa n’igihe cy’imyaka ine, Aston Villa imyaka itatu naho Barcelona imyaka ibiri kugira ngo zibe zageze ku bipimo bisabwa.
Chelsea na Aston Villa byagaragaye ko zarengereye ku mategeko yiswe football earnings and squad-cost rules (SCR), aho ikipe itemerewe gukoresha amafaranga arengeje 80% y’ayo yinjiza ku mishahara n’ibindi bijyanye n’abakinnyi. Ku ruhande rwa Aston Villa, izajya icibwa miliyoni €5 (miliyari 6.8 Frw) buri mwaka mu gihe izaba yongeye kurenga ku mategeko.
UEFA itangaje ko mu mwaka wa 2024-25 hatangiye igihe gishya cy’imyaka itatu cyo kugenzura imikoreshereze y’imari. Ku ruhande rwa Villa, iyi kipe yizeye kuzubahiriza SCR ndetse ikongera imbaraga mu ikipe ya Unai Emery muri iyi mpeshyi. Iyi kipe kandi yagerageje kugurisha ikipe yayo y’abagore kugira ngo yubahirize amategeko ya Premier League, ariko iravuga ko bitayisaba kugurisha abakinnyi bayo b’ingenzi.
Nubwo Villa ishaka kubika abakinnyi bayo, ejo hazaza ha Emiliano Martínez, umunyezamu w’ikipe y’igihugu ya Argentine ufite amasezerano kugeza mu 2029, haracyari mu rujijo. Chelsea, Manchester United na Atlético Madrid bivugwa ko bamwifuza, nubwo nta kipe iratanga igitekerezo ku isoko kugeza ubu.
Ni mu gihe Aston Villa imaze gutangaza ko yatandukanye na Philippe Coutinho, wahise yerekeza burundu muri Vasco da Gama yo muri Brazil. Iyi kipe ikomeje igikorwa cyo kugabanya abakinnyi, aho Kaine Kesler-Hayden yamaze kwerekeza muri Coventry mu masezerano ya miliyoni £3.5, mu gihe Emiliano Buendía, Louie Barry na Alex Moreno nabo bashobora guhita batandukana na Villa.
Izindi kipe zahanwe
Mu yandi makipe yahanwe na UEFA harimo Lyon yaciwe miliyoni 12.5 z’amayero , Besiktas ibihumbi 900 by’amayero, Panathinaikos ibihumbi 400, na Hajduk Split yaciwe ibihumbi 300 by’amayero, bose bashinjwa kurenga ku mategeko y’imari mu mupira w’i Burayi.
Aya makipe yose yasabwe gukorana bya hafi na UEFA no kwitwararika ku ngengo y’imari yazo, kugira ngo hatagira izisubira mu bihano birimo no gukatwa amanota cyangwa guhagarikwa mu marushanwa y’i Burayi.
