Urubuga 'world population review' rugaragaza ko ku munsi byibuze hitaba Imana abantu 172,824 ku Isi yose, bisobanuye ko urupfu ari ikintu gisanzwe kibaho cyane mu bantu.
Gusa akenshi abantu bashengurwa n'urupfu rw'umuntu runaka bitewe n'akamaro yari amariye aho yari atuye, uburyo yapfuyemo, byumwihariko imyaka yari afite ari nacyo cyatumye urupfu rwa Diogo Jota ndetse n'umuvandimwe we André Silva rushengura benshi.
Uru ni urutonde rw'abakinnyi ba ruhago 10 bitabye Imana bakiri bato mu mateka y'Isi
10.Ugo Ehiogu, imyaka 44
Uyu umukinnyi akomoka mu Bwongereza, akaba yarakiniye amakipe atandukanye muri iki gihugu arimo nka Tottenham Hotspur, Aston villa, Rangers ndetse n'ayandi.
Ugo Ehiogu yahitanwe no guhagarara k'umutima gutunguranye ari ku kibuga cy'imyitozo cya Tottenham Hotspur mu mwaka 2017.
9.Gary Speed, imyaka 42
Gary Speed nyuma yo gukina umupira w'amaguru mu makipe atandukanye muri Premier League ndetse n'ikipe y'igihugu, yaje gutangira umwuga wo gutoza ariko aza kwitaba Imana tariki 27 Ugushyingo 2011 ku myaka 42.
Uyu yapfuye nyuma yo gufata umwanzuro wo kwimanika mu mugozi arapfa.
8.Justin Fashanu, imyaka 37
Justin Fashanu yitabye Imana mu mwaka 1998 afite imyaka 37 y'amavuko, akaba yariyahuye nawe.
Yakiniye amakipe akomeye mu Bwongereza nka Manchester City, Newcastle United, Brighton& Hove Albion ndetse n'ikipe y'igihugu y'u Bwongereza y'abato.
7.Dean Richards, imyaka 36
Dean Richards yakinaga nka myugariro, akaba yaravukiye mu Bwongereza 1974, yaje kwitaba Imana mu mwaka 2011 azize uburwayi bw'igihe kirekire.
6.Robert Enke, imyaka 32
Umuzamu w'ikipe y'igihugu y'Ubudage kuva 1997, ndetse akinira amakipe atandukanye muri iki gihugu Hannover 96, Borussia Mönchengladbach gusa yaje no kujya muri Esipanye akinira Barcelona.
Uyu munyezamu yitabye Imana nyuma yo kwiyahura muri gariyamoshi ikamugonga agahita apfa.
5.Cheick Tiote, imyaka 30
Cheick Tiote yapfuye urupfu rutunguranye apfiriye mu myitozo kubera guhagarara k'umutima. Yitabye Imana ari mu gihugu cy'Ubushinwa mu mugi wa Beijing.
Uyu Munya-Côte d'Ivoire mu makipe akomeye yakiniye harimo nka Newcastle United, Twente ndetse na R.S.C. Anderlecht.
4.Marc-Vivien Foe, imyaka 28
Ku myaka 28 Marc-Vivien Foe yafashwe n'umutima yikubita hasi ahita apfa mu mukino wahuzaga Cameroon na Colombia i Lyon mu Bufaransa.
Yakiniye ikipe y'igihugu ya Cameroon imikino irenga 60 ndetse akinira n'amakipe akomeye nka Manchester City, West ham United ndetse n'izindi.
3.Andres Escobar, imyaka 27
Myugariro Andres Escobar akomoka muri Colombia yitabye Imana mu mwaka 1994, yishwe n'abagizi ba nabi i Medellín muri Colombia.
Amakuru avuga ku rupfu rwe yemeza ko yarashwe nabo bagizi ba nabi amasasu atanu bamuziza kwitsinda igitego mu gikombe cy'Isi cyo mu mwaka 1994, bigatuma Leta Zunze Ubumwe za Amerika zigira amahirwe yo gukomeza imbere ya Colombia.
2.Miklos “Miki” Feher, imyaka 24
Rutahizamu ukomoka mu gihugu cya Hongiriya wakiniye amakipe nka FC Porto, Brag , Benfica ndetse n'ayandi, yitabye Imana ku myaka 24 mu mwaka 2004.
Yishwe n'indwara zifitanye isano n'umutima ndetse n'ibihaha apfira iwabo muri Portugal.
1.Antonio Puerta, imyaka 22
Antonio Puerta niwe mukinnyi uzwi w'umupira w'amaguru witabye Imana ari muto ku myaka 22 azize umutima.
Mu mukino wari wahuje Sevilla and Getafe yagize ikibazo cy'umutima abaganga bagerageza kumwitaho ariko birangira yitabye Imana i Seville mu gihugu cya Esipanye.
