Lionel Messi yavuye muri FC Barcelona mu mpeshyi ishize yerekeza muri PSG ku buntu, kuko FC Barcelona yari ifite ibibazo by'ubukungu bitayemerera kumwongerera amasezerano.
N'ubwo Lionel Messi yemeraga kugabanya 50 ku ijana y'umushahara we, Joan Laporta uyobora FC Barcelona yamubwiye ko iyi kipe nta bushobozi ifite bumwongerera amasezerano byemewe n'amategeko.
Inkuru dukesha ikinyamakuru El Pais cyandikira muri Espagne, iravuga ko myugariro Gerrard Pique yaba yaregereye perezida Joan Laporta akamugira inama yo kudasinyisha Lionel Messi andi masezerano ku bw'ibibazo by'ubukungu iyi kipe yari ifite.
Pique na Messi yavuye mu ikipe imwe y'abana ya FC Barcelona yitwa La Masia, ndetse bamarana imyaka 14 bakinana muri FC Barcelona nkuru aho batwaranye ibikombe bitandukanye.
Mu kwezi gushize byavuzwe ko Lionel Messi yiyumvise nk'uwagambaniwe na Gerrard Pique nyuma y'uko Pique agabanyije umushahara we ariko akabikora aruko Messi amaze kugenda.
Izindi nshuti za hafi Messi yari asigaranye muri Barcelona arizo Jordi Alba na Sergio Busquet, bo bari bamaze kugabanya imishahara ngo barebe ko ikipe yabo yabona uko isinyisha Messi, ariko Pique we yabikoze atinze.
Umunyamakuru Lluis Canut yabwiye TV3 ati:"Amasezerano Gerrard Pique aherutse kongera yangije cyane Messi ndetse yumva ababaye.
"Kandi na none yumvise asa n'uwahemukiwe na Gerrard Pique, kuko atigeze agabanya umushahara we kugeza Messi agiye, kandi Messi we yumva yari akwiye kuba yarabikoze mbere kugira ngo atava muri FC Barcelona."
Ubu biravugwa ko umubano wa Messi na Pique waba warajemo agatotsi kuko no mu kwezi gushize Lionel Messi yerekeje i Barcelona mu biruhuko ndetse ikinyamakuru SPORT gitangaza ko yatumiye Alba na Busquets ariko ntatumire Pique.
Lionel Messi, Jordi Alba na Sergio Busquets bahuriye muri resitora y'abayapani iherereye i Barcelona tariki 24 Mutarama muri uyu mwaka, ariko Gerrard Pique ntiyari ahari kandi bose barabaye inshuti igihe kirekire muri FC Barcelona.
Pique yakinanye na Messi igihe kinini muri Barça(Image(Reuters)
Umubano wa Messi na Pique wajemo agatotsi(Net-photo)
