Amakuru ava muri Espagne aravuga ko ikipe ya FC Barcelona yaba ishaka kugarura myugariro Marc Bartra ndetse n'ibiganiro bikaba byaratangiye.
Marc Bartra ufite imyaka 30 yageze mu ishuri ry'umupira rya La Masia afite imyaka 11 aza kuzamuka muri FC Barcelona nkuru akinamo imikino 103.
Uyu myugariro yagurishijwe muri Borussia Dortmund mu 2016 nyuma aza kujya muri Real Betis aho amaze gukina imikino106 kuri ubu ndetse akaba akomeje kuyifasha kwitwara neza cyane.
Bartra ni umwe mu bakinnyi bameze neza muri Real Betis ya Manuel Pellegrini dore ko ubu muri La liga yicaye ku mwanya wa Gatatu n'amanota 33 ikaba irushwa inota rimwe na FC Sevilla ya kabiri.
Ikinyamakuru kitwa Diario Sport kikavuga ko ashobora gusubira i muhira akajya gutozwa na Xavi Hernandes bahoze bakinana muri iyi kipe ya FC Barcelona.
Ikipe ya FC Barcelona ikeneye kongera imbaraga mu mpande zose dore ko ubu iri kubarizwa ku mwanya wa munani ku rutonde rw'agateganyo rwa shampiyona ya La liga.
Real Betis ya Marc Bartra iherutse gutsinda FC Barcelona igitego kimwe ku busa ubwo yari yabasuye i Camp Nou mu mukino wa shampiyona.
Gusa n'ubwo FC Barcelona ishaka uyu myugariro, siyo imushaka gusa kuko na AC Milan yo mu Butariyani yifuza cyane uyu mugabo w'imyaka 30 ngo ayifashe mu bwugarizi.
Kuri uyu wa Gatandatu ikipe ya FC Barcelona irakina na Elche. Iyi Barça iri ku mwanya wa munani n'amanota 24 ndetse ikaba irushwa amanota ane na Atletico Madrid iri ku mwanya wa kane.
Iyi kipe iherutse kwisanga mu mikino ya Europa league nyuma yo gusezererwa muri champions league, ikaba rero ishaka kujya mu makipe ane ya mbere kugira ngo izaboneke muri UEFA champions league mu mwaka utaha.
Marc Bartra arifuzwa na FC Barcelona yamureze(Image:Marca)
Marc Bartra afatiye runini Real Betis(Image:Sport)
