Nyuma y'imikino y'amakipe y'ibihugu, kuri uyu wa Gatandatu shampiyona ziragaruka mu bihugu bitandukanye.
Ikipe ya Manchester United igomba guhura na Watford itozwa na Claudio Ranieri ku isaha ya saa 17:00 ku kibuga Vicarage road.
Cristiano Ronaldo yagiye ku rubuga rwe rwa Instagram aho akurikirwa n'abantu barenga miliyoni 368, avuga ko yiteguye gukora byose kugira ngo ikipe ibone amanota atatu ndetse anasaba bagenzi be gukora nkawe.
Cristiano akomeza kurokora Manchester United(Image:Eurosport)
Cristiano yagize ati:"Igihe ni iki ngo duhagaruke dukore akazi neza kandi dukomeze gukurikira icyo dushaka guhigura uyu mwaka."
Ikipe ya Manchester United imaze iminsi mu bihe byo gutsindwa aho mukeba Manchester City iherutse kuyitsinda ibitego 2-0 bamwakiriye. Ndetse na Liverpool yari yabanje kuyitsinda akayabo k'ibitego 5-0.
Uru ruhererekane rw'intsinzwi nirwo rwongeye kubyutsa amarangamutima y'abafana bakomeje kwifuza ko umutoza Ole Gunnar Solskjaer yakwirukanwa.
Ole Gunnar Solskjaer akomeje kujya ku gitutu(Image:Sky sports)
Saa 17:00 kuri stade Vicarage road nibwo ikipe ya Watford iraza kuba yakira Manchester United byitezwe ko mu gihe ikipe ya Manchester United itatsinda byakomeza gushyira umutoza Ole Gunnar Solskjaer mu kaga.
