Kuri uyu wa Kane Perezida wa Repubulika y'u Rwanda Paul Kagame ari i Quai d'Orsay mu murwa mukuru w'u Bufaransa Paris, aho yitabiriye inama yiga ku gukora inkingo ihuza u Bufaransa na Afurika Yunze Ubumwe.
Ni inama yateguwe n'Ihuriro Mpuzamahanga rigamije guteza imbere ibijyanye n'Inkingo ku Isi Gavi Alliance.
Umukuru w'Igihugu yagaragaje ko nyuma y'aho icyorezo cya Covid-19 cyadutse, Abanyafurika bahisemo gushinga uruganda rukora inkingo zabo, ibyaje kongera ubufatanye hagati yabo.
Yagaragaje ko Covid-19 yahitanye abarenga miliyoni kandi izana uburyo bushya bw'ubusumbane mu bihugu byo mu Isi, ikindi avuga ko iki cyoreza cyageze mu bihugu byose, gusa akagaragaza ko uburyo bwo gutanga inkingo bwakozwe nabi.
Perezida Kagame yanavuze ko mu Ukuboza 2023 uruganda rukora inkingo rwa Bion Tech rwafunguwe mu Rwanda ruba urwa Mbere muri Afurika rukora inkingo, aho yahishuye ko mu 2021 ari bwo igitekerezo cyarwo cyazanwe n'Ibihugu biri muri AU ari byo Ghana, Senegal, Afurika y'Epfo n'u Rwanda.
