Ibi byatangajwe binyuze ku muyobozi w'Ishyirahamwe ry'umupira w'amaguru muri Uganda, Moses Hassim Magogo aho yari yasuye abakinnyi aho bacumbitse muri hoteli y'ishyirahamwe (FUFA Hotel).
Nyuma gato haje no gushyirwa hanze itangazo rijyanye n'iyi gahunda umukuru w'igihugu yateguriye ikipe y'igihugu mu rwego rwo kubatera imbaraga zo kuzitwara neza.
Perezida Museveni yagennye miliyari 1.2 z’amashilingi ya Uganda (485,098,345 Frw) kuri buri mukino 'Uganda Cranes' izajya itsinda muri iyi CHAN bakiriye bafatanyije na Kenya ndetse na Tanzania.
CHAN 2024 iri gukinwa mu 2025, yatangiye tariki 02 Kanama 2025 ikaba izarangira kuri 30 Kanama 2025. Kuri ubu hamaze gukinwa imikino ine yabonetsemo intsinzi eshatu no kunganya kumwe.
Uganda irakina umukino wayo wa mbere kuri uyu munsi aho iza guhangana na Algeria kuri Sitade Nkuru y'Igihugu yitiriwe Nelson Mandela (Mandela National Stadium), ku isaha ya saa moya (19:00PM) za Kigali.
Iyi kipe y'umutoza Paul Put iri mu itsinda rya gatatu aho iri kumwe na Guinea, Niger, Afurika y'Epfo ndetse na Algeria.
Kenya iri mu bihugu byakiriye irushanwa yatsinze umukino wayo wa mbere
Ikipe y'igihugu ya Uganda itegejweho kubona intsinzi nk'ikipe yakiriye irushanwa
