Imikino ya kimwe cya kane ya UEFA Champions league yasojwe igaragaje ko amakipe abiri yo mu Bwongereza ariyo Liverpool na Manchester City azahura n'andi makipe abiri yo muri Espagne ariyo Real Madrid na Villarreal.
Imikino ibanza yabaye mu cyumweru gishize yari yarangiye Real Madrid itsinze Chelsea ibitego bitatu kuri kimwe mu mukino wabaye ku wa gatatu, naho umukino wo kwishyura utari woroshye wabereye i Santiago Bernabeu muri Espagne urangira ari ibitego bitatu bya Chelsea kuri bibiri bya Real Madrid.
Ibitego bya Chelsea byatsinzwe na Mason Mount, Antonio Rudiger naTimo Welner, ariko igitego Rodrygo yatsinze ku munota wa 80 nicyo cyatumye iminota 90 irangira ari ibitego 3-1 hongerwaho iminota 30. Aha ku munota wa 96 Karim Benzema yatsinze ibitego cya kabiri kinasoza umukino, bituma Real Madrid ikomeza ku giteranyo cy'ibitego bitanu kuri bine bya Chelsea.
Ubwo Real Madrid na Chelsea zarimo zisobanura, ni nako mu Budage hari urubanza rukomeye hagati ya Bayern Munich na Villarreal. Umukino ubanza wabereye muri Espagne mu cyumweru gishize wasize Villarreal itunguye Bayern Munich iyitsinda igitego kimwe ku busa.
Mu mukino wo kwishyura Bayern Munich yari mu rugo yabonye igitego ku munota wa 52 gitsinzwe na Robert Lewandowski, ariko kubona icya kabiri biba ingume. Igitego cyatsinzwe na Samuel Chukueze nicyo cyatumye Villarreal yishyura biba 1-1 ariko ihita ikomeza muri 1/2 kuko yatsinze umukino ubanza igitego kimwe ku busa.
Imikino yabaye kuri uyu wa Gatatu nayo yasize igaragaje andi makipe abiri yageze muri 1/2. Manchester City yagiye kunganyiriza ubusa ku busa na Atletico Madrid muri Espagne, bituma iyi kipe ya Pep Guardiola ikomeza kuko yatsinze umukino ubanza igitego kimwe ku busa.
Ku rundi ruhande ikipe ya Liverpool yanganyije na Benfica ibitego bitatu kuri bitatu. Iyi kipe ya Jurgen Klopp yari yakoze impinduka z'abakinnyi barindwi basanzwe babanza mu kibuga, nyuma y'uko yari yatsinze ibitego 3-1 mu mukino ubanza bikaba ari nabyo byatumye ikomeza.
Liverpool yatsindiwe na Ibrahima Konate na Robert Firmino watsinze ibitego bibiri, naho Benfica itsindirwa na Goncaro Ramos, Roman Yaremchuk na rutahizamu umeze neza cyane Darwin Nunez.
Imikino ya kimwe cya kabiri Manchester City izahura na Real Madrid, naho Liverpool ihure na Villarreal. Imikino ibanza izaba tariki 26 Mata 2022, naho iyo kwishyura ibe tariki 03 Gicurasi 22. Umukino wa nyuma wo uzaba tariki 28 Gicurasi 2022, ukaba uzabera kuri Stade de France mu Bufaransa.
