Paul Pogba yakinnye umukino wa nyuma muri Manchester United

Paul Pogba yakinnye umukino wa nyuma muri Manchester United

 Apr 22, 2022 - 13:35

Byamaze kwemezwa ko imvune Paul Pogba yagize itazatuma yongera gukina muri uyu mwaka w'imikino, mu gihe amasezerano ye ari kugana ku musozo.

Mu gihe amasezerano ya Paul Pogba muri Manchester United ibyumweru bike cyane, birashoboka cyane ko umukino iyi kipe yanyagiwemo na Liverpool ibitego 4-0 waba ariwo wa nyuma Paul Pogba ayikiniye.

Nyuma yo kugirira imvune muri uyu mukino, umutoza Ralf Rangnick mu kiganiro n'itangazmkuru gitegura umukino wa Arsenal yemeje ko uyu musore byibuze azamara ibyumweru bine hanze y'ikibuga bivuze ko amahirwe menshi aruko azagaruka uyu mwaka w'imikino wararangiye.

Rangnick yagize ati:"Bamunyujije mu cyuma ejo biragaragara ko ashobora kutongera gukina kugeza uyu mwaka w'imikino urangiye. Umuganga yambwiye ko igihe gito byafata ari ibyumweru bine ngo akire, kandi umukino wa nyuma uri mu mpera za Gicurasi. Ubwo rero sinkeka ko azongera gukina."

Paul Pogba yagize imvune(Net-photo)

Ku mukino Manchester United ifitanye na Arsenal kuri uyu wa Gatandatu iraba yagaruye abakinnyi batandukanye barimo Scott McTomnay, Varane ndetse na Cristiano Ronaldo utarakinnye na Liverpool nyuma yo gupfusha umwana we w'umuhungu.

Amasezerano ya Paul Pogba muri Manchester United ararangirana n'uyu mwaka w'imikino ndetse ibiganiro hagati ye n'iyi kipe bisa n'ibyahagaze, akaba agomba kuva muri iyi kipe akareba ikipe yindi yajyamo aho havugwa PSG, Juventus na Real Madrid.

Paul Pogba yagarutse muri Manchester United mu 2016 nyuma yo kuyivamo mu 2012 ubwo yerekezaga muri Juventus n'ubundi ku buntu. Manchester United yamugaruye imuguze miliyoni 105 z'amayelo ndetse aca agahigo k'umukinnyi wari uhenze ku isi muri icyo gihe.

Gusa bigaragara ko ibyo yaje atekerezwaho ntabyo yakoze, kuko igikombe gikomeye yatwaye muri iyi kipe ari UEFA Europa league yatwaye mu 2017 ubwo iyi kipe yatozwaga na Jose Mourinho.