Ibitangazamakuru byo muri Madagascar biratangaza ko iri tegeko ryashyizweho umukono ku wa Kabiri w'icyumweru cyashize, nubwo amakuru yatangiye kumenyekana mu mpera z'icyumweru.
Muri Gashyantare 2024, nibwo Sena ya Madagascar yatoye itegeko ryo gukona hakoreshejwe kubaga umuntu wese wahamwe n'icyaha cyo gusambanya umwana ku ngufu, rihita rishyikirizwa Perezida Andry Rajoelina nawe waje kuriha umugisha.
Iri ni itegeko ryateje impagarara hirya no hino mu miryango mpuzamahanga iharanira iburenganzira bwa muntu, ivuga ko ibyo ari ubugome. Muri Mata 2024 ambasaderi w'Ubumwe bw'Uburayi muri iki gihugu Isabelle Delattre yaje kwirukanwa kubera kwamagana iri tegeko.
Leta ya Madagascar ivuga ko hari hakenewe uburyo bukarishye bwo guca intege abasambanya abana ku ngufu.
Ibinyamakuru by'imbere mu gihugu biravuga ko iki gihano kigizwe no kubaga imyanya myibarukire y’uwahamijwe icyo cyaha, bagahagarika ubushobozi bw’imirerantanga (ku bagore) n’udusabo tw’intangangabo (ku bagabo) bwo kurekura intanga ibyara no kwifuza imibonano mpuzabitsina.
Iryo tegeko rivuga ko mu kubikora hazubahirizwa uburenganzira bwa muntu bwo kudakorerwa iyicarubozo.
Muri Mutarama 2004 gusa hari hamaze kubarurwa ibirego 133 by’ibi byaha, mu gihe mu mwaka ushize hari habaruwe ibirego 600 byo gufata abana ku ngufu.
