Paris Saint-Germain irasabwa kugabanya imishahara ihemba abakinnyi bayo ku kigero cyo hejuru cyane, ndetse ibi bishobora kuyiviramo kugurisha abakinnyi nka Neymar cyangwa Messi, dore ko aba babiri bahembwa miliyoni 1.6 mu mapawundi ku cyumweru.
PSG niyo kipe ifite abakinnyi benshi bahembwa amafaranga menshi mu Bufaransa dore ko ku rutonde rw'abakinnyi 20 bahembwa agatubutse muri iki gihuhu, 18 bose bakinira iyi kipe ya PSG ihora itwara ibikombe bya shampiyona.
Kuri ubu DNCG ishinzwe kugenzura ibijyanye n'ubukungu muri shampiyona y'ubufaransa yatangaje ko nta kipe izongera kwemererwa guhemba imishahara yayo ngo amafaranga arenge 70% y'ayo iyo kipe yinjiza. Kuri ubu 91% y'ibyo PSG yinjiza byose bigendera mu guhemba abakinnyi.
Kugira ngo PSG yikure muri icyo kibazo birasaba ko hakorwa impinduka zikomeye cyane mu buryo iyi kipe ihemba kandi zigakorwa ku buryo bugaragara. Neymar winjiye muri iyi kipe mu 2017 aguzwe miliyoni 198 z'amapawundi bivugwa ko ahembwa ibihumbi 850 by'amapawundi ku cyumweru.
Naho Lionel Messi uherutse kujya muri iyi kipe ava muri FC Barcelona we akaba ahembwa ibihumbi 700 byamapawundi ku cyumweru, mu gihe Kylian Mbappe ahembwa ibihumbi 460 ku cyumweru.
Aba bagabo batatu nibo bayoboye mu guhembwa akavagari muri iyi kipe ndetse mu gihe PSG yaba ibonye uko yikuraho umwe muri bo, ibintu bishobora kujya mu buryo mu gihe hatabura n'abandi bakinnyi basohoka.
91% ry'ibyo PSG yinjiza bigenda mu mishahara(Net-photo)
Amakuru amaze igihe kirekire avugwa ko Kylian Mbappe agomba kuva muri iyi kipe akerekeza muri Real Madrid yo muri Espagne, ariko abo muri PSG baracyafite ikizere ko uyu mukinnyi yakongera amasezerano.
Mu gihe yaba ahagumye PSG birashoboka ko yashaka uwo irekura hagati ya Lionel Messi na Neymar Jr kuko bo bari no kugana mu za bukuru, ndetse ikinyamakuru AS cyo muri Espagne kivuga ko PSG ishobora kwemera guhomba igatanga Neymar kuri miliyoni 76 z'amapawundi zonyine.
Ibi kandi bije nyuma y'uko iyi kipe y'abanyamujyi ya Paris umwaka wabo utagenze neza nk'uko bari babyiteze. N'ubwo iyi kipe yatwaye igikombe cya shampiyona, ntibyabujije abafana bayo kubavugiriza induru bitewe n'ukuntu bakuwemo na Real Madrid muri 1/8 cya UEFA Champions league.
