Nyuma y'uko bitangajwe ko rutahizamu Sergio Aguero agiye kumanika inkweto kubera ikibazo cy'umutima, ikipe ya FC Barcelona ishaka undi rutahizamu.
Umutoza wayo mushya Xavi ashaka ko bamuzanira rutahizamu yatozaga mu ikipe ya Al Sadd mu gihugu cya Qatar witwa Baghdad Bounedjah.
Baghdad Bounedjah ukinira Al Sadd(Image:Kick442)
Martin Braithwaite afite ikibazo cy'imvune yo mu ivi, bivuze ko umwataka usigaye ari Memphis Depay wenyine muri FC Barcelona. Niyo mpamvu Xavi yerekeje amaso muri Al Sadd.
Nk'uko bitangazwa na SPORT, Xavi ashaka ko bamuzanira Baghdad Bounedjah wa Al Sadd mu ikipe ya FC Barcelona.
Xavi yakinanye na Baghdad Bounedjah nyuma akamubera umutoza mu ikipe ya Al Sadd muri Qatar.
Xavi na Bounedjah muri Al Sadd(Image:Sport)
Uyu munya-Algeria w'imyaka 29 yageze muri Al Sadd mu 2015 aguzwe miliyoni zisaga £3.Yatsinze ibitego biruta imikino yakinnye kuko yakinnye imikino 153 ndetse atsinda ibitego 159.
Mu mwaka w'imikino ushize Baghdad Bounedjah niwe watsinze ibitego byinshi muri shampiyona ya Qatar ndetse ubu afite ibitego 11 mu mikino 9 imaze gukinwa.
