Byari mu mukino wa Premier league 2 wahuje ikipe ya Manchester United y'abatarengeje imyaka 23 aho bari bakiriye Arsenal y'abatarengeje imyaka 23 kuri uyu wa Gatanu wabereye kuri stade ya Old Trafford Manchester United isanzwe yakiriraho imikino yayo.
Muri uyu mukino Noam Emeran, umuhungu Fritz Nkusi Emeran wakiniye Amavubi, yafashije iyi kipe ya Manchester United y’Abatarengeje imyaka 23 atsinda igitego cyatumye bacyura inota rimwe.
Arsenal y’Abatarengeje imyaka 23 niyo yafunguye amazamu ku gitego cyatsinzwe na Mika Biereth ku mupira yateye nyuma y'uko umuzamu Radek Vitek yari amaze gukuramo ishoti ryatewe na Taylor-Hart ku munota wa 29.
Ku munota wa 47 igice cya kabiri kigitangira nibwo Manchester United yabonye igitego cyatsinzwe na Noam Emeran wari uherejwe na Shola Shoretire, amakipe yombi ahita anganya igitego 1-1 ari nako umukino warangiye.
Noam Emeran yafashije Manchester United-23 kubona inota rimwe(Net-photo)
Uyu wari umukino w'umunsi wa 25 aya makipe yombi yakinaga, ndetse shampiyona yabo iri kugana ku musozo kuko igizwe n'amakipe 14 bivuze ko bakina imikino 26.
Ikipe ya Manchester City niyo iyoboye uritonde aho afite amanota 51, ikurikiwe na West Ham United ifite amanota 42, Arsenal ifite amanota 40 naho Manchester United ifite amanota 39.
Noam Emeran w’imyaka 19, yageze muri Manchester United muri Gashyantare 2019, nyuma y’uko yifuzwaga n’andi makipe akomeye ku mugabane w’u Burayi nka Paris Saint-Germain yo mu Bufaransa, FC Barcelona yo muri Espagne na Juventus yo mu Butaliyani.
Mu Ugushyingo uwo mwaka ni bwo yasinye amasezerano ya mbere nk’uwabigize umwuga nyuma yo kuzuza imyaka 17.
Uyu musore ukiri muto yavukiye i Paray le Monial mu Bufaransa mu 2002, kuri Fritz Emeran wakiniye Ikipe y’Igihugu Amavubi ndetse na mama we w’Umunyarwandakazi, akaba afite ubwenegihugu bw'Ubufaransa.
Muri uyu mwaka w'imikino wa 2021-2022 Noam Emeran yakinnye imikino 12 abasha gutsinda ibitego bibiri, ndetse anatanga imipira ibiri yavuyemo ibitego. Uyu musore akaba akina asatira izamu aca ku ruhande rw'ibumoso.
