I Rutshuru rwambikanye hagati ya M23 na FARDC

I Rutshuru rwambikanye hagati ya M23 na FARDC

 Jun 13, 2024 - 13:13

Imirwano yongeye gukaza umurego mu burasirazuba bwa Repubulika Iharanira Demokarasi ya Congo hagati ya M23 na FARDC muri Terirwari ya Rutshuru.

Mu gitondo cyo kuri uwa Kane tariki ya 13 Kamena 2024, amakuru aturuka mu burasirazuba bwa DR-Congo, aremeza ko umutwe witwaje intwaro wa M23 wabyutse utana mu mitwe na FARDC hamwe n'abafatanyabikorwa babo muri Teritwari ya Rutshuru muri Kivu y'Amajyaruguru.

Biratangazwa ko imirwano ya none yatangiriye mu gace ka Butalongola gaherereye muri Kanyabayonga muri Rutshuru, aho abari ku ruhande rwa Leta ya DR-Congo bavuga ko M23 ari yo yatangije ibitero igahita isubizwa inyuma.

Ni mu gihe sosiyete sivile yo muri Rutshuru iri gutangaza ko guhera kuri uyu wa Gatatu, ihuriro rya M23/AFC riri gukaza ibirindiro muri Rwindi na Vitshumbi ku mupaka uhuza DRC na Uganda. 

Ku rundi ruhande,  akanama k'impuguke ka Loni kari gutangaza ko Uganda itanga ubufasha ku nyeshyamba za M23, mu gihe u Rwanda ari rwo rwari rumaze igihe rushinjwa gutera inkunga uyu mutwe.